म. टा. प्रतिनिधी, कोल्हापूर
प्रदूषण नियंत्रणाच्या नियमांचे उल्लघंन केल्याप्रकरणी इचलकरंजीतील दोन आणि हातकणंगले लक्ष्मी औद्योगिक वसाहतीमधील एक अशा तीन टेक्साईल कारखान्यांना बंद करण्याचा आदेश प्रदूषण नियंत्रण मंडळाचे उपप्रादेशिक अधिकारी प्रशांत गायकवाड यांनी दिले. वीज आणि पाणी तोडण्याचे आदेश देण्यात आले आहे. युनिराज टेक्साईल प्रोसेसिंग (लक्ष्मी औद्योगिक वसाहत), ईश्वर डायिंग, महेश सायझिंग (इचलकरंजी) असे त्या कारखान्यांची नावे आहेत.
पंचगंगा नदीचे प्रदूषण रोखण्यासाठीच्या उपाययोजनांचा आढावा घेण्यासाठी गेल्या आठवड्यात पर्यावरण मंत्री रामदास कदम यांनी येथे बैठक घेतली. या बैठकीत प्रदूषण रोखण्यात अपयशी ठरलेल्या अधिकाऱ्यांना चांगलेच धारेवर धरले होते. त्यानंतर प्रदूषण नियंत्रण मंडळाच्या अधिकाऱ्यांच्या पथकाने इचलकरंजी आणि लक्ष्मी औद्योगिक वसाहतीमध्ये जाऊन पाहणी केली. त्यावेळी युनिराज, ईश्वर, महेश तीन कारखान्यांतून सांडपाणी आणि रसायनमिश्रीत पाणी प्रक्रियेविना बाहेर पडत असल्याचे निदर्शनास आले.
'युनिराज' वर जवळच्या ओढ्यात तर ईश्वर, महेश या कारखान्यांवर इचलकरंजीतील काळ्या ओढ्यात सांडपाणी सोडल्याचा ठपका ठेवण्यात आला आहे. प्रदूषणप्रकरणी या तिन्ही कारखान्यांना बंदचे आदेश दिल्याने खळबळ उडाली आहे. तीन कारखान्यांचे वीज तोडण्याचे आदेश वीज वितरण कंपनीला तर पाणी कनेक्शन बंद करण्याचे आदेश पाटबंधारे खात्याला प्रदूषण नियंत्रण मंडळ प्रशासनाने दिले आहेत.
---------------------
कोट
'प्रदूषित पाणी थेट बाहेर सोडताना निदर्शनास आल्याने युनिराज, ईश्वर, महेश कारखान्यांना बंदचे आदेश दिले आहेत. या तिन्ही कारखानदारांनी प्रदूषण नियंत्रणाच्या नियमांचे उल्लघंन केले आहे. जोपर्यंत प्रदूषणासंबंधीच्या त्रुटींची पूर्तता करणार नाहीत, तोपर्यंत कारखाने सुरू करू नयेत, असे आदेश देण्यात आले आहेत.
प्रशांत गायकवाड, उपप्रादेशिक अधिकारी, प्रदूषण नियंत्रण मंडळ
------------