कोल्हापूर
'जुना बुधवार पेठे येथील पोलिस निवासस्थान बांधकामाला मंत्री एकनाथ शिंदे यांनी स्थगिती दिली. पण स्थगितीनंतरही बांधकाम सुरूच आहे. तसेच बांधकाम क्षेत्रात येणाऱ्या जुन्या झाडांबाबत हरकती देण्याबाबत महापालिका प्रशासनाने मखलाशी केली आहे,' असा आरोप करत पर्यावरणप्रेमींनी सोमवारी शहर अभियंता नेत्रदीप सरनोबत यांची भेट घेतली. 'पोलिस निवासस्थानासाठी सुरू असलेल्या बांधकाम प्रकल्पामध्ये सुमारे ८० वर्षापूर्वीची दोन झाडे येत आहेत. ही दोन्ही झाडे तोडून टाकण्याचा विचार सुरू झाडे तोडण्यास पर्यावरण प्रेमींनी विरोध केला. त्यानंतर काम थांबवण्यात आले. तसेच आयुक्त डॉ. कलशेट्टी यांनी खोदाईमुळे उघड्यावर आलेल्या झाडांच्या झाकूण ठेवण्याचे आदेश पोलिसांना दिले. पण महिन्यानंतरही मुळ्या झाकूण ठेवलेल्या नाहीत. त्यामुळे झाडे एका बाजूने सुकू लागली आहेत. प्रक्रियेनुसार झाडे तोडण्यासाठी प्रशासनाकडे परवानगी मागितली आहे. अर्जानंतर प्रशासनाने हरकती मागवल्या असून झाडावर नोटीस चिकटवण्यात आली आहे. नोटिसीवर २३ तारखेचा उल्लेख असताना प्रत्यक्षात शनिवारी (ता. २८) लावण्यात आली आहे. तसेच बांधकाम बंदिस्त असल्याने नोटिसच दिसत नाही,' असा आरोप करण्यात आला.