म. टा. प्रतिनिधी, कोल्हापूर
मार्केट यार्ड येथील शेती उत्पन्न बाजार समितीत भाजी खरेदीदारांची पासेस घेण्यासाठी गर्दी केली होती. पोलिस प्रशासनाने भाजी खरेदीदारांना पास सक्तीचा केला आहे.
बाजार समितीत भाज्यांच्या सौद्याच्यावेळी सुरक्षित वावराचा अवलंब होत नसल्याचे भाज्यांचे सौदे बंद केले होते. त्यानंतर पोलिस बंदोबस्तात भाज्यांचे सौदे सुरू करण्यात आले. ज्या भाजी खरेदीदार व्यापारी, विक्रेत्यांकडे पास असेल त्यांना शेतकऱ्यांकडून भाजी खरेदी करण्याची परवानगी दिली आहे. अनेक खरेदीदारांकडे पास नसल्याने त्यांनी बाजार समितीकडे पासेसची मागणी केली. मंगळवारी पासेससाठी खरेदीदारांनी मोठी गर्दी केली होती. आवश्यक कागदपत्रांची पूर्तता केल्यानंतर त्यांना पासेस देण्यात आले. बाजार समितीत शेतकरी, अडते, व्यापारी, खरेदीदार यांच्यासाठी सुरक्षित वावर या बाबतीत कडक नियमांचे पालन केले जात आहे.