मुदतवाढीनंतरही ९४६ जागा राहिल्या रिक्त

कोल्हापूर : प्राथमिक शिक्षकांसाठी अनिवार्य असलेल्या डिप्लोमा इन इलिमेंट्री एज्युकेशनच्या (डीइएलएड्) २०१६-१७ व २०१७-१८ अभ्यासक्रमासाठी बुधवारी प्रवेश प्रक्रिया पूर्ण झाली. अखेरच्या दिवशी २१४ विद्यार्थ्यांनी प्रवेश निश्चित केले. त्यामुळे एकूण १ हजार ७३६ जागांपैकी ७९० विद्यार्थ्यांनी अभ्यासक्रमासाठी प्रवेश निश्चित केले. जिल्ह्यातील एकूण ९४६ जागा रिक्त राहणार असल्याचे स्पष्ट झाले आहे. डी. एड्., बी. एड्, एम. एड्., बीपी. एड्., आणि अभियांत्रिकी अभ्यासक्रमांच्या बुहतांशी जागा रिक्त राहिल्या असल्याने विद्यार्थी मिळवण्यासाठी अनेक महाविद्यालयांना आटापिटा करावा लागणार आहे.

गेल्यावर्षी ६० टक्के जागा रिक्त राहिल्या होत्या. यंदाही विद्यार्थ्यांनी अभ्यासक्रमाकडे पाठ फिरवली आहे. २१ ते ३१ जुलैपर्यंत डीएडची अर्ज दाखल करण्याची मुदत होती. मात्र राज्यभर प्रतिसाद कमी असल्याने तीन ऑगस्टपर्यंत मुदतवाढ दिली गेली. कोल्हापूर जिल्ह्यातील सहा अनुदानित आणि ३६ विनाअनुदानित अध्यापक महाविद्यालये आहेत. यातून एकू १७३६ जागा उपलब्ध आहेत. ३१ जुलैपर्यंत ५७६ विद्यार्थ्यांनी प्रवेश निश्चित केला. मुदत वाढवल्यानंतर यात २१४ विद्यार्थ्यांची भर पडली. खुल्या प्रवर्गातून ५३० तर आरक्षित प्रवर्गातून २६० अशा एकूण ७९० विद्यार्थ्यांनी प्रवेश निश्चित केला.