म. टा. प्रतिनिधी, कोल्हापूर
सार्वजनिक गणेशविसर्जन मिरवणुकी दरम्यान उभारण्यात येणाऱ्या स्वागत मंडपावरून महापालिका प्रशासन आणि राष्ट्रवादी काँग्रेसमध्ये वाद उफाळून आला. पापाची तिकटी येथे मंडप उभारणीची राष्ट्रवादीने तयारी केली असता, बुधवारी प्रशासनाने त्याला विरोध केला. कोणत्याही परिस्थितीत प्रशासनाने नेहमीच्या ठिकाणी मंडप उभारणार असल्याचे स्पष्ट केल्याने वाद अधिक वाढण्याची शक्यता आहे.
सार्वजिनिक गणेशविसर्जन मिरवणुकीदरम्यान ठिकाठिकाणी राजकीय पक्ष, सामाजिक संस्था, संघटना याचबरोबर महापालिकेच्या वतीने पानसुपारी देऊन मंडळांचे स्वागत केले जाते. यासाठी मिरवणूक मार्गावर मंडप उभारणी केली जाते. गेल्या अनेक वर्षांपासून पानसुपारी देऊन मंडळांचे स्वागत करण्याची परंपरा महापालिकेने जपली आहे. मंडळांच्या स्वागतासाठी महापालिका दरवर्षी पापाची तिकटी येथे स्वागत मंडपाची उभारणी करते. शहराच्या प्रथम नागरिकांच्या हस्ते स्वागत होत असल्याने त्याला विशेष महत्त्व असते. पण गेल्या दोन वर्षांपासून महापालिका प्रशासन आणि राष्ट्रवादी काँग्रेसमध्ये मंडप उभारण्याच्या जागेवरून दरवर्षी वाद उत्पन्न होत आहे. बुधवारी महापालिकेचे काही अधिकारी विसर्जन मिरवणूक मार्गाची पाहणी करण्यास गेले असता, पुन्हा मंडप उभारणीच्या जागेवरून वाद निर्माण झाला.
दोन वर्षांपूर्वी महापौरपद राष्ट्रवादी काँग्रेस पक्षाकडे असताना मंडप उभारणीसाठी महापालिकेने परवानगी दिली. त्यावेळीही राष्ट्रवादीतील पदाधिकाऱ्यांचा महापालिका प्रशासनाबरोबर वाद झाला. पण तत्कालीन पोलिस अधीक्षक प्रदीप देशपांडे यांनी सामोपचाराची भूमिका बजावली. महापौरपद राष्ट्रवादी काँग्रेसकडे असताना देशपांडे यांनी प्रशासनाला मंडप उभारणीसाठी जागा देण्याची सूचना केली. त्यानुसार महापालिकेने परवानगी दिली, पण यावर्षी पुन्हा मंडप उभारणीवर पक्षाचे कार्यकर्ते व प्रशासनातील अधिकाऱ्यांमध्ये वाद निर्माण झाला आहे. प्रशासनाने मात्र कोणत्याही स्थितीत परंपरेनुसार पूर्वीच्याच जागेवर मंडप उभारण्याचा निश्चय केला आहे. त्यामुळे पुढील दोन दिवसांत मंडप उभारणीवरून प्रशासन आणि राष्ट्रवादीच्या पदाधिकाऱ्यांमध्ये आणखी वाद चिघळण्याची शक्यता आहे.
०००
शिवसेनेच्या मंडप उभारणीस सुरुवात
सार्वजनिक मंडळांच्या गणेशमूर्तींचे रविवारी विसर्जन होणार आहे. विसर्जन मिरवणुकीला अद्याप चार दिवसांचा अवधी आहे. मंडळाचे देखावे खुले झाले आहेत. शहरासह ग्रामीण भागातील भाविक देखावे पाहण्यास गर्दी करू लागले आहेत. विसर्जन मिरवणुकीला अवधी असला, तरी देखावे पाहण्यासाठी अनेक भाविक येत असल्याने शिवसेनेने स्वागत मंडप उभारणीस बुधवारपासून सुरुवात केली आहे. त्यामुळे सर्वात प्रथम उभारण्यात येत असलेल्या मंडपाची शहरात चांगलीच चर्चा होऊ लागली आहे.
०००