म. टा. प्रतिनिधी, कोल्हापूर
हातकणंगले तालुक्यातील कवठेसारचे पोलिस पाटील नंदकुमार पाटील यांच्यावर एका अल्पवयीन मुलीवर अत्याचार केल्याचा आरोप करत डेमोक्रेटिक पार्टी ऑफ इंडियातर्फे सोमवारपासून जिल्हाधिकारी कार्यालयासमोर बेमुदत धरणे आंदोलन सुरू केले आहे.
अत्याचाराबाबत पोलिसांत तक्रार दिल्यानंतर पोलिस पाटलाने त्या कुटुंबाचे अपहरण केले. अपहरण केलेल्या तिघांचा जयसिंगपूर पोलिस शोध घेत नाहीत. तिघांचाही घातपात झाल्याचा संशय आहे. भादोलीतील एका मातंग समाजातील महिलेवर अत्याचार करून खून करण्यात आला. त्यातील आरोपींवर कडक कारवाई झालेली नाही. दिवसेंदिवस अल्पसंख्याक, दलित कुटुंबावर अत्याचार वाढत आहेत. त्यांना असुरक्षित वाटत आहे. कवठेसार येथील संशयित पाटील यास तातडीने अटक करावी, अपहरणातील आरोपीला शोधून काढण्याकडे दुर्लक्ष करणाऱ्या पोलिस अधिकाऱ्यांवर कारवाई करावी, पीडित कुटुंबास पोलिस संरक्षण द्यावे या मागण्याही करण्यात आल्या. आंदोलनात नंदकुमार नांगरे, बाबासाहेब फाळके, प्रा. सुकुमार कांबळे, सतिश भंडारे आदी सहभागी झाले आहेत.