जिल्ह्यात डेंगीचे प्रमाण चिंताजनक

Maruti.Patil@timesgroup.com

tweet: @MarutipatilMT

कोल्हापूर : प्रतिबंध हाच उपाय, असा समज करून जिल्हा आरोग्य यंत्रणेने डेंगीचा फैलाव रोखण्यासाठी लोकसहभाग वाढविण्याची हाकाटी दिली. मात्र, यामध्ये जिल्हा व महापालिका आरोग्य यंत्रणा सपशेल अपयशी ठरल्याने डेंगीची लागण आणि मृत्यूच्या प्रमाणात कोल्हापूर जिल्ह्यात चिंताजनक स्थिती असल्याचे दिसून येत आहे. राज्य आरोग्य विभागाने जानेवारी ते ऑक्टोबर महिन्याची आकडेवारी नुकतीच प्रसिद्ध केली. दहा महिन्यांत जिल्ह्यातील १,७०१ जणांना डेंगीची लागण झाली असून, त्यापैकी पाच रुग्ण मृत्युमुखी पडले आहेत. कोल्हापूरनंतर अनुक्रमे मुंबई, नाशिक, पुणे जिल्ह्यांचा क्रमांक लागतो.

साथीच्या रोगांचा फैलाव रोखण्यासाठी जिल्हा आणि महापालिकास्तरावर विविध प्रयत्न केले जातात. तरीही डेंगी व स्वाइन फ्लूसारख्या रोगांचा फैलाव रोखण्यास आरोग्य यंत्रणेला अपयश आल्याचे सिद्ध झाले आहे. राज्य आरोग्य विभागाने दहा महिन्यांतील डेंगीच्या रुग्णांची आकडेवारी प्रसिद्ध केली. यामध्ये राज्यात ६,९४८ रुग्ण आढळले असून त्यापैकी २९ रुग्णांना प्राण गमवावा लागला आहे. गतवर्षी राज्यात ४,७९७ रुग्णांना डेंगीची लागण झाली होती. त्यापैकी २१ रुग्ण मृत्युमुखी पडले होते. २०१८ वर्ष संपण्यास अद्याप दीड महिन्यांचा अवधी शिल्लक असला, तरी गतवर्षीपेक्षा यावर्षी लागण व मृत्युमुखी पडलेल्या रुग्णांच्या संख्येत वाढ झाल्याचे स्पष्ट होत आहे.

जिल्ह्यात डेंगीची चिंताजनक स्थिती पाहता आरोग्य विभागाचे अपयश अधोरेखित होत आहे. राज्यातील ६,९४८ डेंगीच्या रुग्णांपैकी जिल्ह्यात १,७०१ रुग्ण आढळले आहेत. कोल्हापूरपेक्षा जास्त लोकसंख्या असलेल्या मुंबई, नाशिक, पुणे जिल्ह्यांत कोल्हापूरपेक्षा कमी रुग्ण आढळले आहेत. जिल्ह्याच्या ग्रामीण भागात १,३३३ तर शहरात ३६८ जणांना डेंगीची लागण झाली आहे. डेंगीची लागण होऊन राज्यात २९ रुग्णांचा मृत्यू झाला आहे. मृत्युमुखी पडणाऱ्या डेंगीच्या रुग्ण संख्येत मुंबई पहिली, तर कोल्हापूर दुसऱ्या स्थानावर आहे. कोल्हापूर जिल्ह्यात जानेवारी ते ऑक्टोबरअखेर शहरात दोन व ग्रामीण भागात तीन असे पाच रुग्ण दगावल्याचीही नोंद आहे.

कारवाईनंतरही रुग्णसंख्येत वाढ

शहरात केवळ जुलैच्या पहिल्या दहा दिवसांत २३० रुग्ण आढळून आले होते. महापालिकेच्या सर्वेक्षण मोहिमेदरम्यान अनेक ठिकाणी डास पैदास करणारे घटक निदर्शनास आले होते. त्यानंतर महापालिका आरोग्य यंत्रणेने डास पैदास होण्यास जबाबदार असलेल्या अनेक घटकांवर दंडात्मक कारवाई केली होती. या कारवाईनंतरही शहरातील डेंगीच्या रुग्णांमध्ये घट न होता वाढच झाल्याची नोंद आहे.


४,७९७

राज्यातील डेंगी रुग्ण (२०१७)

२१

मृत्यू

......

६,९४८

राज्यातील डेंगी रुग्ण (२०१८)

२९

मृत्यू

२०१८ मधील आकडेवारी

जिल्हा लागण रुग्ण मृत्यू

कोल्हापूर १,७०१ ५

मुंबई ८५५ ९

पुणे ६६० ४

सोलापूर ३४२ ४

गेल्यावर्षीपेक्षा डेंगी रुग्णांची संख्या यावर्षी कमी होती. पुढील वर्षी आणखी कमी होणार आहे. साथीच्या रोगांचा फैलाव रोखण्यासाठी लोकसहभाग महत्त्वाचा आहे. त्यासाठी जनजागृती मोहीम हाती घेतली. तसेच डास पैदास होण्यास कारणीभूत ठरलेल्या अनेकांवर दंडात्मक कारवाई केली आहे.

डॉ. दिलीप पाटील, आरोग्याधिकारी, महापालिका

जुलै, ऑगस्टमध्ये डेंगीच्या रुग्णांमध्ये वाढ झाली होती, पण सप्टेंबरमध्ये हे प्रमाण कमी झाले आहे. डासांची पैदास रोखण्यासाठी विविध उपाययोजना केल्या जात असून, आठवड्यातून एक दिवस कोरडा दिवस पाळला जात आहे. डेंगीला अटकाव करण्यासाठी साचून राहणारे पाण्याचे साठे नष्ट करण्याची आवश्यकता आहे.

डॉ. योगेश साळे, जिल्हा आरोग्य अधिकारी