डॉ. अरुण पाटील यांच्यासह चौघांना न्यायालयीन कोठडी

म. टा. वृत्तसेवा, इचलकरंजी

कुमारी माता व विधवा महिलांच्या अर्भकांची बेकायदेशीर विक्री प्रकरणी अटकेत असलेल्या डॉ. अरुण पाटील याच्यासह चौघा आरोपींना न्यायालयाने १४ दिवसांची न्यायालयीन कोठडी सुनावली. डॉ. अरुण पाटील, उज्ज्वला पाटील, अभियंता अनिल दशरथ चहांदे, त्याची पत्नी प्रेरणा चहांदे (दोघे रा. नवरगाव) या चौघांची कोल्हापूर येथील कारागृहामध्ये रवानगी करण्यात आली. कुमारी माता व विधवा महिला यांची बेकायदेशीरपणे प्रसुती करुन त्यांच्या अर्भकांची विक्री केली जात असल्याचा धक्कादायक प्रकार उघकीस आल्यानंतर पोलिसांनी जवाहरनगर येथील डॉ. अरुण पाटील व त्यांच्या पत्नी उज्ज्वला यांना अटक केली आहे. तर पाटील यांच्याकडून अर्भक विकत घेतल्याप्रकरणी नवरगांव (जि. चंद्रपूर) येथील अनिल चहांदे व प्रेरणा चहांदे या अभियंता दाम्पत्याला अटक करण्यात आली आहे. या चौघांना न्यायालयाने तिसऱ्यांदा दोन दिवसांची पोलिस कोठडी सुनावली होती. त्याची मुदत आज संपल्याने या चौघांना न्यायालयासमोर हजर करण्यात आले. न्यायालयाने या सर्वांना न्यायालयीन कोठडी सुनावली आहे.