म. टा. प्रतिनिधी, कोल्हापूर
महापालिकेत झिरो पेंडन्सी उपक्रम राबवून प्रलंबित कामे वेळेत पूर्ण करणारे आणि शहरातील सर्वच प्रभागांना भेटी देणारे आयुक्त म्हणून नावलौकिक असलेल्या आयुक्त डॉ. अभिजित चौधरी यांची बुधवारी सांगली जिल्हाधिकारी पदावर नियुक्ती झाली. पावणेदोन वर्षांच्या कालावधीत नागरी समस्यांचा निपटारा करण्यात यश आले आल्याचे त्यांनी पत्रकारांशी बोलताना सांगितले.
डॉ. चौधरी यांनी एप्रिल २०१७ मध्ये आयुक्तपदाचा पदभार स्वीकारला होता. झिरो पेंडन्सीतून प्रलंबित कामे करण्यात त्यांनी यश मिळवले. टास्कच्या माध्यमातून त्यांनी अधिकाऱ्यांवर एक दरारा निर्माण केला होता. त्याचा अनेक अधिकाऱ्यांनी धसका घेतला होता. त्यामुळे प्रशासनाला शिस्त लावण्यात त्यांनी कमालीचे यश मिळवले होते. विशेषत: सावित्राबाई फुले रुग्णालयात येणाऱ्या रुग्णांना सुविधा देण्यास त्यांनी प्राधान्य दिले. सुमारे तीन कोटींचा निधी खर्च करुन रुग्णालयाचे रुपच पालटले. महात्मा फुले जनआरोग्य योजना लागू होण्यासाठी त्यांनी आवश्यक निकष पूर्ण करण्यास प्रयत्न केले. त्यांच्या प्रयत्नांमुळेच नुकताच रुग्णालयाचा या योजनेत समावेश झाला आहे. स्वत:सह इतर वरिष्ठ अधिकाऱ्यांना कार्यालयीन शिस्त लावण्यासाठी बायोमेट्रिक हजेरीचा उपक्रमाला नव्या वर्षापासून सुरुवात केली. 'राजर्षी शाहूंच्या समतेच्या भूमीत काम करताना विशेष आनंद झाला. महापालिकेतील कारकीर्द भविष्यात उपयोगी ठरेल,' असे डॉ. चौधरी यांनी सांगितले.
नूतन आयुक्त डॉ. मल्लिनाथ कलशेट्टी सोमवारी पदभार स्वीकारणार असून त्यांचे शिक्षण शिवाजी विद्यापीठात झाले आहे. त्यांनी खेड, सातारा येथे गटविकास अधिकारी, सांगली जिल्हा परिषदेच्या उपमुख्य कार्यकारी अधिकारी पदावर काम केले आहे. मंत्रालयात उपसचिव, यवतमाळ जिल्हा परिषदेचे मुख्य कार्यकारी अधिकारी व नंदुरबारचे जिल्हाधिकारी म्हणून काम पाहिले आहे.