म. टा. प्रतिनिधी, कोल्हापूर
राज्य उत्पादन शुल्क विभागाच्या पथकाने दोन ठिकाणी कारवाई करून अवैधरित्या गावठी आणि देशी दारू तयार करण्यासाठी वापरले जाणारे स्पिरीट आणि काळा गूळ पकडला. उचगाव रेल्वेरुळ परिसरातून स्पिरीट आणि किणी टोल नाका परिसरातून गूळ पकडून दोन्ही ठिकाणी मिळून सुमारे ६ लाख रुपयांचा मुद्मेमाल जप्त केला. या प्रकरणी चौघांना अटक करण्यात आली. अवैद्य स्पिरिट प्रकरणी आकाश मनोज पवार (वय २३ रा. शेळके गल्ली, इचलकरंजी) व ओंकार अशोक सावंत (वय २१, रा. इचलकरंजी) या दोघांना आणि काळा गूळ वाहतूक केल्याप्रकरणी सर्जेराव संपत कांबळे (रा. चोपदारवाडी ता. पाटण) आणि सुनील दिनकर जाधव (रा. पेठवडगाव) या दोघांना अटक करण्यात आली आहे.
उत्पादन शुल्क विभागाचे अधीक्षक गणेश पाटील यांनी दिलेल्या माहितीनुसार, निरीक्षक एस. एस. साळवे यांच्या पथकाला उचगाव येथील रेल्वे रुळाजवळ स्पिरिटची अवैध वाहतूक केली जात असल्याची माहिती खबऱ्याकडून मिळाली. त्यांनी पथक तैनात केले. या पथकाने छापा टाकून एक संशयित वाहन ताब्यात घेतले. त्यामध्ये आठ बॅरेल स्पिरीट सापडले. याप्रकरणी चालक आकाश पवार आणि ओंकार सावंत यांच्याकडे कसून चौकशी केली असता त्यांनी अवैध वाहतुक केल्याची कबुली दिली. त्यांच्याकडून आठ बॅरेल मधील १६०० लिटर स्पिरीटसह वाहन असा एकूण ४ लाख ६८ हजारांचा मुद्देमाल जप्त केला.
पथकाने दुसरी कारवाई पुणे-बेंगळुरू महामार्गावरील किणी टोल नाका येथे केली. पथकाला महामार्गावर एक संशयित मालवाहू टेम्पो दिसला. त्याची कसून तपासणी केली असता त्यामध्ये दारू तयार करण्यासाठी लागणाऱ्या गुळाचा साठा सापडला. टेम्पोचा चालक सर्जेराव कांबळे आणि सुनील जाधव यांनी गुळाची चोरटी वाहतूक करीत असल्याची कबुली दिली. पथकाने टेम्पोसह १० किलो गूळ असा सुमारे दीड लाखांचा मुद्मेमाल जप्त केला. कारवाईत उपनिरीक्षक प्रवीण शेलार, माधव चव्हाण, दत्तात्रय लाडके, जवान सुहास वरुटे, जयसिंग घोटाळे, सुखदेव सिद, स्वप्नील मोहिते, मोहन पाटील, दीपक कापसे, नितीन ढेरे आदींनी सहभाग घेतला.