फोटो...
म. टा. वृत्तसेवा, निपाणी
तुतारीचा हुकांर... बासरीचा सूर... ढोल-कैताळाचा टिपेला पोहोचलेला निनाद, झेंडे, छत्र्या, देवाचे मुखवटे, अब्दागिरी, अशा सर्व लवाजम्यासह श्री क्षेत्र आप्पाचीवाडी (ता. चिकोडी) येथील श्री हालसिद्धनाथ यात्रेत विलोभनीय पालखी सोहळा पार पडला. हा पालखी सबिना याची देही याची डोळा पाहण्यासाठी महाराष्ट्रासह कर्नाटकातील हजारो भाविक दाखल झाले होते. हालसिद्धनाथांच्या नावानं चांगभलंच्या अखंड नामघोषात तल्लीन होऊन भाविकांनी नाथांच्या दर्शनासाठी गर्दी केली होती.
ढोलांचा आवाज, कैताळांचा निनाद तसेच बासरीच्या सुरांनी परिसर दुमदुमला होता. नाथांच्या भक्तांनी मंदिरात दिलेल्या उसाची कर वाघापूर व रायबाग येथील मानकऱ्यांकडून तोडली. कर तोडल्यानंतर वालंगाचा सोहळा झाला. नाथांच्या सबिन्यामध्ये मानाचे अश्व, बकरी, पुजारी, मानकरी, भाकणूक सांगणारे भगवान डोणे यांच्यासह भाविकांनी खडकावरील मंदिराची प्रदक्षिणा पूर्ण करून पालखी सबिना वाड्यातील मंदिराकडे गेला. वाड्यातील मंदिरात हालसिद्धनाथांच्या मूर्तीची व गादीची प्रतिष्ठापना करण्यात आली. तेथून कुर्लीची पालखी लवाजम्यासह चालत कुर्लीकडे रवाना झाली. कुर्लीतील हालसिद्धनाथ मंदिरात वालंग करण्यात आला. भाकणूक कथन करणारे भगवान डोणे यांचा येथून परतीचा मार्ग सुरू झाला. ते कुर्ली येथून नानीबाई चिखली, खडकेवाडा, यमगे, मुरगूडमार्गे वाघापूरला रवाना झाले. यावेळी एसटी महामंडळाने बसची सोय केली होती.
आसमंत पिवळा धमक
मंदिरासभोवती प्रदक्षिणा घालण्यासाठी पालखी बाहेर पडताच भाविकांनी पालखीवर लोकर, खारीक, खोबरे तसेच मोठ्या प्रमाणावर भंडाऱ्याची उधळण केली. यामुळे नाथांची मूर्ती प्रतिष्ठापना करण्यात आलेल्या खडक मंदिर परिसरातील आसमंत पिवळा धमक झाला होता.
नेटके संयोजन
यात्राकाळात भाविकांना प्राथमिक उपचाराची सौंदलगा आरोग्य केंद्राच्या वतीने सोय करण्यात आली होती, तसेच निपाणी पोलिसांनी कडेकोट बंदोबस्त ठेवला होता. तर, कागल, निपाणी, चिकोडी, संकेश्वर, रायबाग, मुरगूड येथून जादा बसगाड्या सोडण्यात आल्या होत्या. त्याचबरोबर, स्थानिक यात्रा कमिटीने गाड्यांच्या वाहनतळासह फेरीवाल्यांची नियोजनबद्ध व्यवस्था केल्याने भाविकांना यात्रेत सुरळीतपणे आत-बाहेर जाता आले.