कापड व्यापाऱ्याचा १०० कोटींचा गंडा

इचलकरंजी

पॉपलिन कापड खरेदी करुन सुमारे १०० कोटी रुपयांचे दिवाळे काढून कापड व्यापारी श्रीकांत तलेसरा हा कुटुंबासह पसार झाला आहे. त्यामुळे पॉपलिन कारखानदारांमध्ये मोठी खळबळ माजली आहे. दरम्यान, श्रीकांत तलेसरा याने इचलकरंजी येथील कार्यालय बंद करुन बालोत्रा (राजस्थान) येथून व्यवहार सुरु ठेवणार असल्याचे निवेदन सोशल मिडीयावर व्हायरल केले आहे. इतक्या मोठ्या प्रमाणात दिवाळ काढण्याचा वस्त्रनगरीतील हा पहिलाच प्रकार आहे.

दरम्यान, या प्रकरणी सायंकाळी उशीरा सुमारे ११६ कारखानदारांनी गावभाग पोलिस ठाण्यात फसवणुकीच्या तक्रारी दाखल केल्या आहेत. हा आकडा सुमारे ३५ कोटींच्या घरात होता. श्रीकांत तलेसरा यांचे वडील गौतमकुमार गेल्या तीन वर्षांपासून कापड खरेदी-विक्रीचा व्यवसाय करीत होते. पॉपलिन कारखानदारांकडून कापड खरेदी करुन ते बालोत्रा येथे विक्री करीत होते. दुसऱ्या कापड व्यापाऱ्यांपेक्षा गौतमकुमार यांच्याकडून प्रतिमीटरला २० ते २५ पैसे जादा मिळत असल्याने शहर व परिसरातील ८० टक्क्यांहून अधिक पॉपलिन यंत्रमागधारक आपल्याकडील कापड त्यांच्याकडे देत होते. मोठे पेमेंट ४५ ते ६० दिवसांत तर लहान पेमेंट ३० दिवसांत मिळत असल्यामुळे कारखानदारांचा गौतमकुमार यांच्यावर विश्वास बसला होता. त्यातूनच जादा पैशाच्या लोभापायी अनेक कारखानदार त्यांच्याशी मोठ्या प्रमाणात व्यवहार करत होते. खरेदी-विक्रीच्या मोठ्या व्यवहारामुळे दिवसातून तीन ते चार ट्रक बालोत्रा येथे जात होते.

गौतमकुमार यांचे २७ फेब्रुवारी रोजी निधन झाले. त्यांच्या निधनानंतर सर्व व्यवहार त्यांचा मुलगा श्रीकांत पाहत होता. आई आजारी असल्याचे कारण देत तो चार दिवसांपासून बालोत्रा येथे निघून गेला आहे. श्रीकांत याने गाव सोडल्याचे वृत्त कळताच त्याच्याकडे कापड विक्रीसाठी दिलेल्या कारखानदारांनी व्यंकोबा मैदान परिसरातील शिवपार्वती ट्रान्सपोर्ट, याचठिकाणी असलेले श्रीकांत याचे ऑफिस आणि वैरण बाजारातील शिवशक्ती ट्रान्सपोर्टच्या कार्यालयात गर्दी केली होती. अनेक कारखानदारांनी आपण दिलेले कापड अद्यापही ट्रान्सपोर्ट गोदामात असल्याचे पाहून कापड तागे परत नेणे पसंत केले. मोठ्या प्रमाणात कापड अडकल्याने आपली फसवणूक झाल्याची फिर्याद देण्यासाठी अनेक कारखानदारांनी शहरातील पोलिस ठाण्यांसह थेट स्थानिक गुन्हे शाखेशी संपर्क साधला.

गावभाग पोलिस ठाण्यात गुरुकन्नननगर येथील कारखानदार तुकाराम गणपती साळुंखे (वय ४७) यांनी श्रीकांत याच्यासह राहुल आणि अक्षय तलेसरा (रा. महालक्ष्मी अपार्टमेंट) या तिघांच्या विरोधात गुन्हा दाखल केला आहे. ७ मार्च ते १२ एप्रिल २०१७ या काळात तलेसरा बंधूंनी विश्वास संपादन करुन साळुंखे यांच्या कारखान्यातील विविध प्रकारचे ६२ लाख ९१ हजार रुपये किंमतीचे कापड खरेदी केले आहे.