लोगो : मटा इम्प'क्ट...
००००
म. टा. प्रतिनिधी, कोल्हापूर
जिल्हा परिषदेसमोरील कागलकर हाउसच्या मागील बाजूस असलेल्या जीमच्या शुल्कात घोटाळा झाल्याचे वृत्त महाराष्ट्र टाइम्समध्ये गुरुवारी प्रसिद्ध झाल्यानंतर खळबळ उडाली. प्रशासनाशी झालेल्या करारानुसार प्रतिवर्षी जिल्हा परिषदेच्या तिजोरीत लिपिकवर्गीय संघटनेने पाच हजार रुपये भरणे बंधनकारक होते. मात्र, पैसे भरले नसल्याचे गुरुवारी समोर आले. अशा गलथान कारभारावर 'मटा'ने प्रकाशझोत टाकल्यानंतर त्याची तातडीने दखल प्रशासनाने घेतली. जीममध्ये व्यायामासाठी येणाऱ्यांकडून घेतलेल्या पैशाच्या हिशेबाची चौकशी करावी, असा आदेश मुख्य कार्यकारी अधिकारी डॉ. कुणाल खेमनार यांनी वित्त विभागाला दिला.
जिल्हा परिषदेच्या स्वनिधीतून जीम उभारली आहे. त्यावर नियंत्रण ठेवण्याची जबाबदारी सामान्य प्रशासनाची आहे. मात्र, त्यांनी सोयीस्करपणे दुर्लक्ष केले. सध्या जीम लिपिकवर्गीय संघटना चालवते. सुट्टी असल्याने व्यायामासाठी येणाऱ्यांची संख्या वाढली आहे. जिल्हा परिषदेचे अधिकारी, पदाधिकारी, कर्मचाऱ्यांकडून साडेतीनशे आणि बाहेरच्यांकडून पाचशे रुपये शुल्क विनापावती घेतली जाते. त्याचे वर्षाला सुमारे पावणे दोन लाख रुपये होतात. ट्रेनरचा पगार आणि व्यायामाच्या यंत्रसामग्रीची देखभाल, दुरुस्तीवरील खर्च वजा करून शिल्लक राहिलेले पैसे कुणाच्या खिशात गेले, हा प्रश्न अनुत्तरित राहत आहे. सरकारी यंत्रणेची जीम असतानाही तीन वर्षांपासून सामान्य प्रशासन शुल्कापोटी घेतलेल्या पैशाचे काय होते, पावती का दिली जात नाही, जमा-खर्च का ठेवला जात नाही, याची विचारणा संघटनेच्या पदाधिकाऱ्यांना का केली नाही, त्यामागचे गुपित शोधण्याची मागणी होत आहे.
जीममधील घोटाळ्याचे वृत्त 'मटा'मध्ये प्रसिद्ध झाल्यानंतर डल्ला मारणारे हादरून गेले आहेत. जीमच्या कामकाजावर प्रशासनाने बैठक घेतली. त्यात लिपिकवर्गीय संघटनेने पुन्हा जीम चालविण्याचा प्रस्ताव दिला आहे. त्यांना जीम चालविण्यास देताना रितसर अटी घातल्या जाणार आहेत. त्यामध्ये लाइट बिल भरणे, सीसीटीव्ही बसवणे, शुल्काची पावती देणे, जमा-खर्च ठेवणे बंधनकारक करण्यात येणार आहे. जीममध्ये उच्चभ्रू कुटुंबांतील महिला, युवती येतात. त्यांच्या सुरक्षिततेसाठी परिसरात सीसीटीव्ही बसविण्यात येणार आहेत.
०००००००००००
चौकट...
संशयास्पद व्यक्तीचा वावर
जीमच्या जवळ आणि परिसरात सध्या रोज एका संशयास्पद व्यक्तीचा वावर वाढला आहे. ती व्यक्ती प्रत्यक्षात व्यायाम करीत नाही. मात्र, परिसरात वावरत असते. व्यायामासाठी येणाऱ्या महिला, युवतींना न्याहाळताना दिसते. त्याचा बंदोबस्त करावा, अशी मागणी होत आहे.
०००००००००००
कोट
जीममध्ये व्यायामासाठी येणाऱ्यांकडून घेतलेल्या शुल्काची पावती देणे बंधनकारक आहे. यापूर्वी घेतलेल्या शुल्क रकमेच्या हिशेबाची तपासणी केली जाईल. यापुढे लिपिकवर्गीय संघटनेला जीम चालविण्यासाठी देताना अटी घातल्या जातील. प्रशासनाचेही नियंत्रण राहील. वित्त अधिकाऱ्यांसोबत बैठक घेऊन जीम चांगल्याप्रकारे चालवण्याचे नियोजन केले आहे.
डॉ. कुणाल खेमनार, मुख्य कार्यकारी अधिकारी
०००००००००००