कोल्हापूर टाइम्स टीम
दिवाळीचा आनंद द्विगुणीत करण्यासाठी गिफ्ट म्हणून ग्रीटिंग, ड्रायफ्रूट्स, परफ्युम्स, वॉलेट, घड्याळ, डायरी, पेनड्रायव्ह देण्याची धांदल सुरू आहे. मित्रमंडळी, जवळच्या नातेवाईकांना थेट भेटून किंवा कुरिअरने, पोष्टाने गिफ्ट पाठवून दिले जात आहे. त्याशिवाय विविध संस्थांनी आपल्या कर्मचाऱ्यांनाही गिफ्टचे वाटप केले आहे.
वर्षातला महत्वाचा सण दिवाळी असल्याने सर्वांच्या घरी आनंदी, उत्साही वातावरण असते. एकमेकांच्या आनंदाची देवाण-घेवाण केली जाते. यानिमित्ताने नाते घट्ट करण्यासाठी विविध वस्तू, ड्रायफ्रूट्स, मिठाई दिली जाते. चीनी भांडी, कपबशी, जार, थर्मास, कीचेन, पितळी वॉटर बॉटल, महागडी घड्याळ, हस्तनिर्मित वस्तू, वॉलेट, क्रॉकरी, बॅग्ज भेट म्हणून दिली जात आहे. आकर्षक पद्धतीने पॅकिंग करून देण्याकडे सध्याचा कल आहे. किमान १०० ते ७०० रुपये असा विविध वस्तूंचा दर आहे. भेटवस्तूंसोबत शुभेच्छा संदेश असलेले ग्रीटिंगही दिले जात आहे.
बदाम, पिस्ता, मनुके, अंजीर, काजू अशा ड्रायफ्रूट्सह पॅकिंग बॉक्सला मोठी मागणी आहे. आकार आणि वजनानुसार कमीत कमी २०० ते ७ हजारांपर्यंत दर आहेत. लहान मुले असलेल्या घरांत चॉकलेटस बॉक्स घेतला जात आहे. शाहूपुरी, राजारामपुरी, लक्ष्मीपुरी, महाद्वाररोड, गांधीनगर येथील मिठाई शॉपीमध्ये खरेदी केली जाते. गेल्या काही वर्षांत अशा प्रकारच्या गिफ्ट्स देण्याचा ट्रेंड आहे. ग्राहकांना आकर्षित करण्यासाठी गिफ्ट विक्रीच्या दुकानासमोर वेगवेगळ्या ऑफर्सचे फलक लागलेत. लकी ड्रॉ आणि विशिष्ट रकमेवर खरेदी केल्यास गिफ्ट दिली जात आहे.
ई- शुभेच्छाच्या युगातही
ई मेल, व्हॉट्सअॅप, एसएमएस अशा माध्यमांतून शुभेच्छा देणाऱ्यांची संख्या मोठी आहे. मात्र अनेकजण पारंपरिक पध्दतीने गिफ्ट देऊन, फोनवरून शुभेच्छा देत आहेत. कार्पोरेट कंपन्याही ग्राहकांना खूश करण्यासाठी आणि नवे ग्राहक निर्माण करण्यासाठी महागड्या भेटवस्तू देत आहेत. त्यात कार अॅक्सेसेरिज, मोबाईल, इलेक्ट्रॉनिक वस्तू दिली जात आहे.
कोट
दिवाळीत मित्रमैत्रिणी, जवळच्या नातेवाईकांना भेटवस्तू देण्यासाठी बाजारपेठेत गर्दी आहे. प्रत्येकाच्या पसंतीनुसार गिफ्ट खरेदी केली जात आहे. दैनंदिन वापरात येणाऱ्या वस्तू देण्याकडे कल जास्त आहे. क्रॉकरी वस्तूंना मागणी चांगली आहे.
- अतुल पाटणे, न्यू आनंद स्टोअर्स