म. टा. वृत्तसेनवा, सांगली
माळवाडी (भिलवडी) येथील शाळकरी मुलीवर अत्याचार करून तिचा खून केल्याप्रकरणी संशयित प्रशांत उर्फ हिमेश राजेंद्र सोंगटे याला कोर्टाने रविवारी नऊ दिवसांची पोलिस कोठडी सुनावली. तासगावचे पोलिस उपाअधीक्षक कृष्णात पिंगळे यांनी कडेकोट बंदोबस्तात सोंगटे याला रविवारी सांगलीत विशेष जिल्हा व सत्र न्यायाधीश एस. एस. सापटणेकर यांच्यासमोर हजर केले.
अल्पवयीन मुलीवर अत्याचार करून तिचा खून केल्याप्रकरणी संशयित प्रशांत सोंगटे (वय २६) याला शनिवारी अटक करण्यात आली आहे. त्याच्यावर बलात्कार, खून आणि सुधारित बाललैंगिक अत्याचार प्रतिबंध कायद्यातील कलमांनुसार गुन्हा दाखल करण्यात आला आहे. त्यामुळे त्याला शनिवारी सांगलीत विशेष न्यायाधीश सापटणेकर यांच्या समोर हजर करण्यात आले. यावेळी जिल्हा सरकारी वकील उल्हास चिप्रे यांनी संबधित संशयिताकडे अजून बराच तपास बाकी आहे. पीडितेवर अत्याचार करून तिचा निर्दयीपणे खून करण्यात आल्याच्या ठिकाणी तपास करायचा आहे. या गुन्ह्यात संशयिताचे आणखी साथीदार सहभागी आहेत काय? या बाबत सखोल तपास करणे आवश्यक असल्याने त्याला पोलिस कोठडी द्यावी, अशी मागणी केली. सरकारी वकिलांची बाजू ऐकून घेतल्यानंतर कोर्टाने २३ जानेवारीपर्यंत म्हणजे नऊ दिवसांची पोलिस कोठडी सोंगटे याला सुनावली. संशयिताला बुरखा घालूनच कोर्टात आणण्यात आले होते. यावेळी आरोपीच्या भोवती कडेकोट पोलिस बंदोबस्त होता.