गोकाकचा धबधबा ठरतोय आकर्षण

बेळगाव ः बेळगावनजीकचा गोकाकचा धबधबा सध्या पर्यटकांचे आकर्षण बनला आहे. गोकाक धबधब्याच्या परिसरात मोठ्या प्रमाणावर पाऊस पडल्यामुळे धबधबा ओसंडून वाहत आहे.

घटप्रभा नदीवरील हा धबधबा पावसाळ्यात अमेरिकेतील नायगारा धबधब्याची आठवण करून देतो. भले मोठे पात्र असलेली घटप्रभा नदीतील पाणी पावसाळ्यात रोरावत खाली कोसळते. त्यातून होणार आवाज, उडणारे तुषार पाहणे हा एक आनंददायी अनुभव असतो. घटप्रभा नदीचे पाणी बावन्न मीटर उंचावरून खाली कोसळते.

घटप्रभा नदीवरील ब्रिटिशांच्या काळात बांधण्यात आलेला झुलता पूल देखील पर्यटकांचे आकर्षण आहे. झुलत्या पुलावरून जाणाऱ्या व्यक्तीला आपला तोल सावरणे अवघड होते आणि त्याची फजिती उडते. ६५९ फूट लांबीचा हा झुलता पूल आजही सुस्थितीत आहे. एक जुने विद्युतनिर्मिती केंद्र देखील धबधब्याजवळ आहे.