गाय दूध खरेदीदरात कपात
गोकुळच्या संचालक मंडळाच्या बैठकीत निर्णय, उत्पादकांमध्ये असंतोष निर्माण होणार
म. टा. प्रतिनिधी, कोल्हापूर
कोल्हापूर जिल्हा सहकारी उत्पादक संघाने (गोकुळ) गायीच्या दूध खरेदी-विक्री दरात दोन रुपयांची कपात करण्याचा निर्णय मंगळवारी झालेल्या संचालक मंडळाच्या बैठकीत घेतला. या निर्णयामुळे गायीचा प्रतिलिटर दूध दर २५ रुपयांवरुन २३ रुपये तर विक्री दर ४४ रुपयांवरुन ४२ रुपये झाला. याचबरोबर कार्यक्षेत्राबाहेरील दूध खरेदी दर १८ रुपये करण्याचा निर्णयही घेतला आहे. सुधारीत दराची अंमलबजावणी गुरुवारपासून (ता. २१) होणार आहे. गोकुळने खरेदी दरात कपात करण्याच्या घेतलेल्या निर्णयाचे तीव्र पडसाद उमटण्याची शक्यता आहे. सरकारने जाहीर केलेल्या दूध दरापेक्षा उत्पादकांना प्रतिलिटर चार रुपये तोटा सहन करावा लागणार असल्याने पुन्हा एकदा उत्पादकांच्या आंदोलनाचा भडका उडण्याची शक्यता आहे.
गेल्या वर्षी झालेल्या शेतकरी संपानंतर राज्य सरकारने गाय व म्हशीच्या दूध खरेदी दरात वाढ करण्याचा निर्णय घेतला. सरकारच्या निर्णयामुळे गायीचा दूध खरेदी दर प्रतिलिटर २५ वरुन २७ रुपये तर म्हशीचा दुधाचा दर ३४ रुपयांवरुन ३६ रुपये झाला. जेमतेम एक महिना दर वाढ उत्पादकांना दिल्यानंतर राज्यातील सर्वच दूध संघांनी गायीच्या अतिरिक्त दुधाचा प्रश्न पुढे करत दोन रुपयांनी दर कपात केली. सरकारच्या आदेशाची पायमल्ली केल्यामुळे कारवाईचा बडगा उगारल्यानंतरही संघांनी दर कपातीचा निर्णय मागे घेतला नाही. याविरोधात उत्पादकांनी मोर्चे, आंदोलन केली, पण दूध संघ आपल्या निर्णयावर ठाम राहिले. गोकुळ व कात्रज संघाने दूध दरवाढीला स्थगिती देण्यासाठी कोर्टात धाव घेतली.
कारवाई टाळण्यासाठी कोर्टात सुनावणी प्रलंबित असताना गुरुवारी (ता.१४) गायीच्या विक्री दर दोन रुपयांनी कपात करण्याचा निर्णय जाहीर केला. पण मंगळवारी झालेल्या संचालक मंडळाच्या बैठकीमध्ये विक्री दराबरोबरच खरेदी दरात दोन रुपयांनी कपात करण्याचा निर्णय घेतला. निर्णयामुळे गायीचा खरेदी दर २५ रुपयांवरुन २३ रुपये होणार असून विक्री दर ४४ रुपयावरुन ४२ रुपये झाला आहे. कार्यक्षेत्राबाहेरील गायीचा दूध खरेदी दर १८ रुपये केला आहे. मात्र गोकुळने खरेदी दरात कपात करण्याचा निर्णय घेतल्याने याचे तीव्र पडसाद उमटण्याची शक्यता आहे. सरकारच्या दराप्रमाणे प्रतिलिटर चार रुपयांचा तोटा उत्पादकांना सहन करावा लागणार आहे. सुधारीत दूध दराची अंमलबजावणी गुरुवारपासून होणार आहे.
गोकुळ शॉपीतील अपहाराबाबत नुकताच अहवाल सादर झाला आहे. भविष्यात गोकुळमध्ये असे प्रकार होऊन नये, याबाबत संचालक मंडळाच्या बैठकीत कोणतीही चर्चा न झाल्याचे खात्रीशीर वृत्त आहे. यामुळे शॉपीतील अपहाराबाबत उलटसुलट प्रतिक्रिया उमटण्याच्या शक्यता आहे.
..................
चौकट
नोकरभरतीवरुन बैठकीत वाद
दूध खरेदी दरात कपात करण्याच्या निर्णयावर सर्व संचालकांमध्ये एकमत झालेले असताना, नोकरभरतीवरुन मात्र चांगलाच वाद उफाळून आला. आकृतीबंधापेक्षा कमी जागा असल्याने काही संचालकांनी त्वरीत नोकरभरतीची मागणी केली. पण यावर एकमत होऊ शकले नाही. गोकुळचे सर्वेसर्वा असलेल्या नेत्यांचे तसे आदेश असल्याने विधानसभा निवडणुकीनंतर नोकरभरती करण्याचा निर्णय घेतला असल्याचे समजते. यामुळे फारशी ताणाताणी न करता सर्वांनी अनुमती दिली. यामुळे लोकसभा व विधानसभा निवडणुकीनंतर गोकुळची नोकरभरती होण्याची शक्यता आहे.
.........................
चौकट
खरेदी दरात कपात नको
गोकुळने ज्या- ज्यावेळी दूध खरेदी दरात वाढ केली, त्यावेळी विक्री दरातही वाढ केली. गोकुळने नुकताच गायीचा विक्री दर दोन रुपयांनी कमी करण्याचा निर्णय घेतला आहे. विक्री दरात कपात केल्याने खरेदी दरात कपात होणार का? असा संभ्रम उत्पादकांमध्ये निर्माण झाला आहे. तसेच सरकारने निश्चित केलेला खरेदीदर देणे बंधनकारक आहे. पण दूध संघाने विक्रीबरोबर खरेदी दरात कपात केल्यास उत्पादकांना फटका बसणार आहे. त्यामुळे गोकुळने व्यवस्थापन खर्च कमी करुन उत्पादकांना जास्तीत-जास्त दर द्यावा. खरेदीदर जर कमी केल्यास न्यायमार्गाने लढा देणार असल्याचे पत्रक गोकुळ प्रशासनाला आमदार सतेज पाटील यांनी दिले आहे.