प्रतीकात्मक तिरडी
आंदोलनाद्वारे निषेध
भूविकास बँक कर्मचाऱ्यांचे नवव्या दिवशी आंदोलन सुरूच
म. टा. प्रतिनिधी, कोल्हापूर
भूविकास बँकेच्या सेवानिवृत्त कर्मचाऱ्यांची थकीत देणी द्यावीत, या मागणीसाठी सुरू असलेल्या आंदोलनाच्या नवव्या दिवशी आंदोलक कर्मचाऱ्यांनी प्रतीकात्मक तिरडी आंदोलन करून सरकारचा निषेध केला. जिल्हाधिकारी कार्यालयासमोर सुरू असलेल्या आंदोलनामध्ये अद्याप कोणताही तोडगा निघाला नसल्याने आंदोलन कती काळ सुरू राहणार, असा अशी चर्चा सहकार क्षेत्रात सुरू आहे.
राज्यातील भूविकास बँका अवसायनात काढल्यानंतर कर्मचाऱ्यांच्या थकीत देण्यांचा मुद्दा समोर आला. यातून मार्ग काढण्यासाठी सहकार विभागाने बँकांची मालमत्ता विक्री करून देणी भागविण्याचे आदेश दिले. पण कोल्हापूर व हातकणंगले येथील भूविकास बँकेच्या मिळकतीवर शेरी इनाम सत्ताप्रकार येत असल्याने मिळकत विक्री थांबली आहे. शेरी इनाम कमी करण्याचे अधिकार स्थानिक पातळीवरील कोणत्याही अधिकाऱ्यांना नसल्याने सध्या हे प्रकरण राज्य सरकारकडे गेले आहे.
कर्मचाऱ्यांनी अनेकवेळा आंदोलन करूनही देणी मिळत नसल्याने १ मे रोजी मंत्र्यांच्या गाड्या अडविण्याचा इशारा दिला होता. इशाऱ्यानंतर पालकमंत्री पाटील यांनी कर्मचाऱ्यांचा प्रश्न निकालात काढण्यासाठी बैठक घेण्याचे आश्वासन दिले. पण त्यांनी बैठक न घेतल्याने कर्मचाऱ्यांनी जिल्हाधिकारी कार्यालयासमोर ठिय्या आंदोलनास सुरुवात केली. आंदोलनाच्या पहिल्या दिवसापासून कर्मचारी अभिनव पद्धतीने आंदोलन करून आंदोलकर्ते जिल्हा प्रशासनाचे लक्ष वेधून घेण्याचा प्रयत्न करत आहेत. जिल्हा प्रशासनाने सोमवारी शेरी इनाम सत्ता प्रकार कमी करण्यासाठी विभागीय आयुक्तांनी अहवाल पाठवले असल्याचे पत्र आंदोलकांना दिले आहे. या पत्राव्यतीरिक्त जिल्हा प्रशासनाने कोणतीही कार्यवाही न केल्याने बँक कर्मचाऱ्यांचे आंदोलन अजूनही सुरू आहे. जिल्हा प्रशासन आंदोलकांच्या बाबतीत कोणतीही सहानुभूती दाखवत नसल्याने आंदोलन अजून किती दिवस चालणार असा प्रश्नही या निमित्ताने उपस्थित होऊ लागला आहे.
मंगळवारी झालेल्या आंदोलनात ए. एम. पाटील, ए. बी. माळी, बी. वाय. पाटील, एस. एम. तावडे, पी. एल. शिंदे, जी. एस. वाघ, जी. एस. इंगळे, एन. एच. वायदंडे, एस. एच. कदम आदी सहभागी झाले होते.