म. टा. वृत्तसेवा, शाहूवाडी
तालुक्यात कोरोना आजाराबाबत आरोग्य प्रशासनाने सतर्कता बाळगली असून परदेशातून तसेच देशात कोरोनाबाधित रुग्ण आढळलेल्या मोठ्या शहरातून येणाऱ्या नागरिकांवर बारकाईने लक्ष केंद्रित केले आहे. इराण, अमेरिका व जपान या परदेशातून अनुक्रमे मलकापूर व भेडसगाव विभागात दाखल काही नागरिकांना आरोग्य विभागाने खबरदारीतून आपल्या निरीक्षणात दोन आठवड्यांच्या काळासाठी ठेवण्याच्या सूचना केल्या आहेत. त्यासाठी आरोग्य कर्मचाऱ्यांच्या नियमित सुट्ट्या स्थगित केल्या असून अधिकाऱ्यांना सतर्कतेच्या सूचना दिल्या आहेत, अशी माहिती आरोग्य अधिकारी डॉ. एच. ए. निरंकारी यांनी दिली.
डॉ. निरंकारी म्हणाले, 'तालुक्यातील मलकापूर, आंबा, येळवण जुगाई परिसरातील नागरिक सौदी, कुवेत, दुबई तसेच अमेरिका आदी देशांमध्ये वास्तव्यास आहेत. कोरोना व्हायरसच्या धास्तीने काहीजण गावाकडे परतत आहेत. वरीष्ठ प्रशासकीय स्तरावरून याची माहिती मिळत असल्याने आरोग्य विभागाकडून संबंधितांना खबरदारीच्या सूचना दिल्या जात आहेत.
मलकापूर विभागात महिन्यांपूर्वी इराणहून आलेल्या नागरिकाबाबत काळजीचे कारण नसल्याचे यावेळी डॉ. निरंकारी यांनी सांगितले.
मलकापूरसह भेडसगाव विभागात अमेरिका व जपान देशांमधून गेल्या आठवड्यात आलेल्या अन्य दोन नागरिकांना दक्षतेच्या सूचना दिल्या आहेत. आरोग्य विभागाने त्यांच्यावर वैयक्तिक लक्ष ठेवल्याचेही त्यांनी सांगितले.