म. टा. वृत्तसेवा, मिरज
म्हैसाळ भ्रूणहत्या प्रकरणी अटकेत असलेला मृत विवाहिता स्वाती जमदाडे हिचा पती प्रवीण जमदाडे याच्या पोलीस कोठडीत तीन दिवसांची वाढ करण्यात आली आहे. आतापर्यंत या प्रकरणी अकरा संशयित आरोपीना अटक करण्यात आली आहे. या सर्वांची कसून चौकशी सुरू आहे. अद्यापही पोलिसांना या प्रकरणी आणखी काही धागेदोरे हाती लागण्याची आशा आहे.
मणेराजुरी (ता. तासगाव) येथील विवाहिता स्वाती प्रवीण जमदाडे हिचा म्हैसाळ येथे डॉ. बाबासाहेब खिद्रापुरे याच्या भारती हॉस्पिटलमध्ये गर्भपात करताना अतिरक्तस्रावाने मृत्यू झाल्यानंतर हे प्रकरण उघडकीस आले. त्यानंतर सखोल चौकशीत १९ भ्रूण पिशवीत घालून ओढ्याकाठी पुरल्याचा धक्कादायक प्रकार उघडकीस आला. या प्रकरणाची गंभीर दखल घेण्यात आली व युद्ध पातळीवर यंत्रणा कामास लागली. पोलिस आणि आरोग्य यंत्रणा या प्रकरणानंतर खडबडून जागी झाल्याचे दिसून आले. अद्यापही या प्रकरणी आणखी काही जण अडकण्याची शक्यता बोलून दाखविली जात आहे.
Mark as Complete
Story Info
History
Comment