म. टा. प्रतिनिधी, कोल्हापूर
काही दिवसाच्या उघडीपीनंतर सोमवारी सकाळपासून पावसाने जिल्ह्यात सर्वदूर हजेरी लावली. शहरात दिवसभर दमदार पाऊस सुरू होता. त्यामुळे अनेक भागात पाणी साचून राहिले. पंचगंगेच्या पाणी पातळीवर दिवसभरात एक फुटाने वाढ झाली. जिल्ह्यातील धरणक्षेत्रात अतिवृष्टी सुरू आहे. पावसामुळे शहरात तीन ठिकाणी झाडे कोसळण्याच्या घटना घडल्या. धरणक्षेत्रात गेले दोन दिवस पावसाचा जोर कायम राहिल्याने भात, सोयाबीन, भुईमूगासह सर्वच पिकांसाठी पोषक ठरणार आहे.
शहरात दुपारचा काही काळ वगळता दिवसभर दमदार पाऊस सुरू होता. सकाळपासूनच पावसाच्या मध्यम व हलक्या सरी कोसळत होत्या. त्यामुळे सखल भागात पाणी साचले. धरणक्षेत्रात जोरदार पाऊस सुरू असल्याने पंचगंगा नदीच्या पातळीत एका फुटाने वाढ झाली. कासारी, कोदे धरणक्षेत्रात अतिवृष्टी झाली. जिल्ह्यातील नद्यांच्या पातळीतही वाढ होत आहे. चंदगड, गगनबावडा, राधानगरी, आजरा, शाहूवाडी, तालुक्यात पावसाचा जोर जास्त होता.
सकाळपासूनच पावसाने दमदार सुरुवात केल्याने शाळकरी मुले आणि नोकरदारांची पंचाईत झाली. जिल्हाधिकारी कार्यालय, लिशां हॉटेल परिसर, जयंती नाला पूल, लक्ष्मीपुरी, ताराराणी चौकासह अनेक भागांत पाणी साचले. ठिकठिकाणी गटारी तुंबल्या. दुपारी काही वेळ पावसाने उघडीप दिली. त्यानंतर दुपारी साडेतीन नंतर पुन्हा संततधार राहिल्याने शहर जलमय झाले. सायंकाळी फेरीवाले, स्टॉलधारकांची तारांबळ उडाली. बाजारपेठेतील वर्दळ कमी झाली.
\B
तीन ठिकाणी झाडे कोसळली\B
पावसामुळे शहरात तीन ठिकाणी झाडे पडण्याच्या घटना घडल्या. शाहूपुरी जिमखाना आणि साइक्स एक्स्टेंशन, टाकाळा परिसरात दुपारी झाड कोसळले. नागरिकांनी अग्निशमन विभागाला माहिती दिल्यानंतर काही वेळातच कर्मचारी घटनास्थळी पोहचले. कर्मचाऱ्यांनी वेगाने झाडे हटवली. जिल्हाधिकारी कार्यालयाच्या मुख्य प्रवेशव्दारावर दुपारी तीनच्या सुमारास झाड कोसळले. तत्पूर्वी काही सेकंद आधीच एक कार आवारात दाखल झाली होती. त्यामुळे या कारचे नुकसान टळले. काही वेळ वाहतूक थांबवून झाड हटवण्यात आले.
\Bइमारत उतरवली\B
शहरातील धोकादायक इमारतीचा प्रश्न पुन्हा ऐरणीवर आला आहे. रविवारी दुपारी महाव्दार कमानीलगतची धोकादायक इमारतीची पडझड झाली होती. शिवाजी मार्केट विभागीय कार्यालयाने ती तत्काळ उतरवली. शहर आणि परिसरात ६९ इमारती धोकादायक आहेत. महापालिकेने त्या इमारतीवर कारवाई सुरु केली आहे. सुरक्षिततेच्या दृष्टिकोनातून संबंधितांना नोटीस दिल्या आहेत.