म. टा. प्रतिनिधी, कोल्हापूर
शाहूवाडी येथील उचत गावातील करोना पॉझिटिव्ह रुग्णाच्या संपर्कात शाहूवाडी आणि कोल्हापुरातील ८८ व्यक्ती आल्याची माहिती पुढे आली आहे. या सर्वांचे स्वॅब तपासणीसाठी घेण्यात आले असून त्यांचे अहवाल अद्याप मिळालेले नाहीत. हा तरुण दिल्लीतील मरकजमधील तबलिक ए जमातच्या कार्यक्रमाला उपस्थित राहिला होता. दरम्यान, शुक्रवारी मिळालेले सर्व २९ अहवाल निगेटिव्ह आल्याने आरोग्य विभागाने सुटकेचा निश्वास सोडला आहे.
दिल्ली येथील निजामुद्दीनमध्ये उपस्थित असलेल्या शाहूवाडी तालुक्यातील पंधरा जणांना सक्तीने ताब्यात घेऊन त्यांना संस्थात्मक विलिनीकरण केंद्रात ठेवले होते. त्यापैकी उचत येथील ३४ वर्षीय व्यक्तीला करोनाची लागण झाल्याचा अहवाल गुरुवारी प्राप्त झाल्याने जिल्ह्यात खळबळ उडाली. ही व्यक्ती तबलिक ए जमातच्या कार्यक्रमाला उपस्थित होती. त्यामुळे या तरुणाच्या संपर्कात आलेल्या व्यक्तींची तपासणी सुरू करण्यात आली आहे. त्याची पत्नी, दोन मुले आणि आई-वडील अशा पाचही जणांची संस्थात्मक विलगीकरण केंद्रात रवानगी करण्यात आली आहे.
संबधित तरुण दिल्लीहून १३ मार्च रोजी सांगलीत आणि तेथून १४ मार्च रोजी सांगलीहून कोल्हापुरात आला. कोल्हापुरात तो सकाळी आठ ते दुपारी चार वाजेपर्यंत मटण मार्केट येथील मशिदीत वास्तव्यास होता. तेथे तो धार्मिक प्रार्थनेत सहभागी झाला होता. मशिदीत परिसरातील नागरिक आणि परिसराबाहेरचे नागरिक प्रार्थनेसाठी येतात. त्यानंतरचे तीन दिवस तो शाहूवाडीत नातेवाईक आणि मित्रांना भेटला. १७ मार्च रोजी त्याला होम क्वारंटाइन करण्यात आले. तीन एप्रिलपर्यंत तो घरीच होता. त्यानंतर त्याला सात एप्रिलअखेर पन्हाळा येथील संस्थात्मक विलिनीकरण केंद्रात ठेवण्यात आले.
हा तरुण पॉझिटिव्ह असल्याचा अहवाल प्राप्त झाल्यानंतर त्याच्याशी संपर्क आलेल्या नागरिकांना शोधून काढण्यासाठी पोलिसांनी शोधमोहीम सुरू केली आहे. काही व्यक्ती स्वत:हून पुढे आले असून त्यांची तपासणी सीपीआरमध्ये करण्यात आली. गुरुवारी आणि शुक्रवारी तरुणाच्या संपर्कात आलेल्या ८८ जणांची तपासणी करण्यात आली.
दरम्यान शुक्रवारी दिवसभरात आणखी ६९ जणांची तपासणी करण्यात आली. त्यामध्ये सीपीआरमधील ४८ आणि एका खासगी हॉस्पिटलमधील एक रुग्णाचा स्वॅब मिरज येथे तपासणीस पाठवण्यात आला आहे. यापूर्वी पाठविलेले २९ रुग्णांचे अहवाल सीपीआरला प्राप्त झाले. हे सर्व निगेटिव्ह आले आहेत.