म. टा. प्रतिनिधी, कोल्हापूर
'शीतकरण आणि शीतकरण साखळी याची व्याप्ती दिवसेंदिवस वाढत आहे. शेतीमाल, उत्पादने, औषधांच्या साठवणुकीबरोबरच या क्षेत्रात निर्यातीची मोठी संधी आहे. यासाठी शीतकरण साखळी कार्यक्षम करणे आवश्यक आहे. त्याद्वारे व्यापारवृद्धीसोबतच राष्ट्रीय उत्पन्नातही भर पडेल,' असे मत थायलंड सरकारचे व्यापार आणि वाणिज्य सल्लागार चेतन नरके यांनी केले.
इंडियन सोसायटी ऑफ हिटिंग, रेफ्रिजरेटिंग अँड एअरकंडिशनिंग इंजिनीअर्स (ईशरे) पुणे चॅप्टर आणि कोल्हापूर, सांगली सब चॅप्टर यांच्या संयुक्त विद्यमाने आयोजित एक दिवसीय 'रेफकॉन २०२०' परिसंवाद आयोजित केला होता. हॉटेल सयाजी येथे हा कार्यक्रम झाला.
नरके म्हणाले, 'या क्षेत्रात काम करणाऱ्या तंत्रज्ञ, अभियंते आणि व्यावसायिक सल्लागारांना केवळ देशपातळीवर नव्हे तर आंतरराष्ट्रीय पातळीवर मोठी संधी निर्माण झाली आहे. ह्या संधीचा लाभ घ्यावा. शेतमाल उत्पादन, दूध संकलनात उत्पादक आणि ग्राहकांत मोठे अंतर आहे. यामुळे काही प्रमाणात उत्पादन वाया जाण्याची शक्यता आहे. याबाबीचा गांभीर्याने विचार होण्याच गरज आहे. या क्षेत्रातील विद्यार्थी, संशोधकांनी आपआपले प्रकल्प प्रस्ताव आंतरराष्ट्रीय स्तरावर मांडल्यास तांत्रिक ज्ञानाची देवाणघेवाण होवू शकेल.'
याप्रसंगी 'गोकुळ'चे कार्यकारी संचालक डी. व्ही. घाणेकर यांनी या क्षेत्रातील अडचणी व अनुभवाबाबत विवेचन केले. परिसंवादात डॉ. श्रीमती एस. एस. माने, डॉ. प्रशांत इनामदार, हर्षल सुरंगे, प्रसात वारियर यांनी मार्गदर्शन केले. 'ईशरे'पुणे चॅप्टरचे अध्यक्ष नंदकुमार माठोडे यांनी संस्थेच्या कार्याचा आढावा घेतला. उपाध्यक्ष दीपक वाणी यांनी प्रास्ताविक केले. कोल्हापूर, सांगली सब चॅप्टरचे अध्यक्ष सुरेश पाटील यांनी स्वागत केले. निमंत्रक नंदकिशोर कोटकर यांनी आभार मानले. याप्रसंगी विरेंद्र बोराडे, अनुश्री रिसवाडकर, भरत कदम, राजेंद्र इंगवले, रविंद्र यादव, प्रसाद माळगे, सरदार शेख, रमेश पोवार, रंगराव एकल आदी उपस्थित होते.