जमादार टोळीवर मोक्का
आणखी सात टोळ्यांवर प्रस्ताव
म. टा. प्रतिनिधी, कोल्हापूर
मारामारी, दहशत, अपहरण, खून, खंडणी असे गंभीर गुन्हे दाखल असलेला इचलकरंजीतील सराईत गुंड गुंड्या जमादार याच्यावर मोक्का कायद्यांतर्गत कारवाई करण्यास आयजी विश्वास नांगरे-पाटील यांनी मान्यता दिली आहे. याशिवाय जिल्ह्यातील सात गुन्हेगारी टोळ्यांवर मोका कारवाईचा प्रस्ताव सादर केला असून, महिन्याभरात कारवाई होणार आहे, अशी माहिती जयसिंगपूर उपविभागाचे उपअधीक्षक कृष्णात पिंगळे यांनी दिली आहे.
टोळीप्रमुख गुंड्या ऊर्फ मुसा अब्दुल रजाक जमादार, अविनाश संजय टेके, शीतल अविनाश टेके, जुबेर गुलाब कोटीवाले, इस्माईल मलिक मुजावर (सर्व रा. इचलकरंजी) अशी त्यांची नावे आहेत. या टोळीवर महाराष्ट्र संघटित गुन्हेगारी नियंत्रण अधिनियम १९९९ चे कलम ३ (१ते ४) २३ (१-अ) प्रमाणे मोकाची कारवाई केली. जिल्ह्यात खून, घरफोड्या, लूटमारीसारख्या घटना वाढत आहेत. जिल्ह्यातील मटका, जुगार व खासगी सावकार यांच्यासह सराईत गुन्हेगारी टोळ्यांवर मोक्काची कारवाई करण्यासाठी त्यांचे प्रस्ताव पाठविण्याचे आदेश पोलिस अधीक्षक संजय मोहिते यांनी दिले होते.
यानुसार जिल्ह्यातून सात प्रस्ताव तयार करून ते विशेष पोलिस महानिरीक्षक नांगरे-पाटील यांच्याकडे मंजुरीसाठी पाठविले आहेत. गुंड्या जमादारच्या टोळीविरोधात इचलकरंजी शहर, गावभाग व शहापूर पोलिस ठाण्यात खून, खंडणी, अपहरण, दरोडा, खुनी हल्ला असे १५ हून अधिक गंभीर गुन्हे दाखल आहेत. या सर्वांना पुणे येथील मोक्का न्यायालयात हजर केले जाणार आहे. याप्रकरणाचा तपास पोलिस उपअधीक्षक पिंगळे करणार असून, राज्याचे अपर पोलिस महासंचालकांच्या मंजुरीनंतर दोषारोपपत्र मोका न्यायालयात सादर केले जाणार आहे.