शाळकरी मुलीच्या अपहरणाचा प्रयत्न

म. टा. वृत्तसेवा, जयसिंगपूर

शिवनाकवाडी (ता.शिरोळ) येथे शाळेतून घरी परतणाऱ्या बारा वर्षीय मुलीचे अपहरण करणाऱ्या तरुणास पोलिसांनी शनिवारी गजाआड केले. दरम्यान संशयित तरुणास ताब्यात द्यावे, या मागणीसाठी संतप्त ग्रामस्थांनी रास्ता रोको केला. तसेच पोलिस गाडीवर दगडफेकही करण्यात आली. या घटनेची नोंद करण्याचे काम कुरुंदवाड पोलिसांत रात्री उशिरापर्यंत सुरू होते.

याबाबत मिळालेली अधिक माहिती अशी, सहावीच्या वर्गात शिकणारी ही मुलगी दुपारी शाळेतून घरी जात होती. यावेळी पत्ता विचारण्याच्या बहाण्याने तरुणाने तिचे अपहरण केले. या घटनेची माहिती ग्रामस्थांनी कुरुंदवाड पोलिसांना दिली. यानंतर कुरुंदवाडचे पोलिस निरीक्षक कुमार कदम व त्यांच्या पथकाने शोध मोहीम राबविली. आवाडे पेपर मिलजवळ संशयितास पोलिसांनी जेरबंद केले.

दरम्यान पोलिस जीपमधून संशयितास नेताना संतप्त ग्रामस्थांनी रास्ता रोको केला. मात्र पोलिसांनी शांततेचे आवाहन केले. मात्र यावेळी जीपवर दगडफेक करण्यात आली. ग्रामस्थांच्या संतापाचा उद्रेक झाल्याने शिरोळ, कुरुंदवाड, इचलकरंजी येथून पोलिस बंदोबस्त मागविण्यात आला. यामुळे शिवनाकवाडीला छावणीचे स्वरूप आले. ग्रामस्थांचे रौद्ररूप पाहून संशयितास शिरोळ येथे हलविण्यात आले. रात्री उशिरापर्यंत या घटनेची नोंद करण्याचे काम सुरू होते.