म. टा. प्रतिनिधी, कोल्हापूर
महापालिकेच्या परवाना विभागात चोरी झाल्याचा धक्कादायक प्रकार शनिवारी (ता. १६) सकाळी उघडकीस आला. शुक्रवारी मध्यरात्रीनंतर हा प्रकार घडल्याची शक्यता महापालिकेच्या कर्मचाऱ्यांनी वर्तवली आहे. चोरट्यांनी १९९० ते २०१५ या काळातील महत्त्वाच्या फाइल्स आणि रजिस्टरचे गठ्ठे लंपास केले आहेत. याबाबत शनिवारी संध्याकाळी लक्ष्मीपुरी पोलिस ठाण्यात फिर्याद दाखल करण्यात आली असून, या चोरीबाबत महापालिका वर्तुळात उलटसुलट चर्चा सुरू आहे.
शिवाजी मार्केटच्या इमारतीत पहिल्या मजल्यावर परवाना विभागाचे कार्यालय आहे. गुरुवारी संध्याकाळी कर्मचारी कार्यालय बंद करून निघून गेले. शुक्रवारी महापालिकेच्या वर्धापन दिनाची सुटी असल्याने कार्यालय बंद होते. शनिवारी सकाळी साडेनऊच्या सुमारास आलेल्या कर्मचाऱ्यांना कार्यालयाच्या शटरचे कुलूप नसल्याचे निदर्शनास आले. आत जाऊन पाहिल्यानंतर काही फाइल्स आणि रजिस्टरचे गठ्ठेही गायब असल्याचे लक्षात आले. यानंतर कर्मचाऱ्यांनी विभागाचे अधीक्षक सचिन जाधव यांना घटनेची माहिती दिली. जाधव यांनी तातडीने कार्यालयात धाव घेऊन घटनेची माहिती अतिरिक्त आयुक्त श्रीधर पाटणकर यांना दिली. पाटणकर यांच्या सल्ल्याने जाधव यांनी लक्ष्मीपुरी पोलिस ठाण्यात फिर्याद दाखल केली.
काही कागदही चोरले
चोरट्यांनी कापडात बांधून कपाटात ठेवलेले फाइल्स आणि रजिस्टरचे गठ्ठे काढले आहेत. काही गठ्ठे सोडून त्यातील फाइल्स विस्कटल्या आहेत. शोध घेऊन चोरट्यांनी १९९० ते २०१५ या काळातील काही महत्त्वाच्या फाइल्स आणि रजिस्टरचे गठ्ठे पळवल्याची चर्चा कर्मचाऱ्यांत आहे. काही फाइल्स चाळून त्यातील पानेही चोरट्यांनी काढली आहेत. चोरट्यांनी शटर बंद केले, मात्र कुलूप नेले. पोलिसांनी इमारतीच्या पहिल्या मजल्यावरील सीसीटीव्ही फुटेज ताब्यात घेतले आहे.
विशिष्ट हेतूनेच चोरी
या विभागात जुने सर्व रेकॉर्ड या कार्यालयात जपून ठेवले आहे. नागरिकांच्या तक्रारींचे निराकरण करण्यासाठी आणि करांच्या वसुलीसाठी हे परवाने महत्त्वाचे असतात. रोख रक्कम किंवा ऐवज कार्यालयात नसतो. याची माहिती असूनही जाणीवपूर्वक काही फाइल्स गायब करण्यासाठीच चोरी केल्याची शक्यता पोलिसांनी वर्तवली आहे. विशिष्ट हेतूने कार्यालयाची माहिती असलेल्या लोकांनीच हे कृत्य केल्याचा संशय पोलिसांनी वर्तवला आहे.