आमदार परिचारकांविरोधात राष्ट्रवादीचे ‘चप्पल मारो’

म. टा. प्रतिनिधी, कोल्हापूर

पंढरपूरचे भाजपचे विधान परिषदेचे आमदार प्रशांत परिचारक यांनी जवानांचा अवमान केल्याच्या निषेधार्थ राष्ट्रवादी युवक काँग्रेसच्यावतीने मिरजकर तिकटी येथे परिचारकांच्या प्रतिकात्मक पुतळ्यास चप्पल मारो आंदोलन करण्यात आले. तसेच परिचारक यांच्या निषेधाच्या जोरदार घोषणाही यावेळी देण्यात आल्या.

भाजपचे आमदार असलेले परिचारक यांनी जवानांबाबत अवमानकारक वक्तव्य काढले होते. त्याबाबत विविध माध्यमांतून तीव्र संताप व्यक्त करण्यात आला होता. राष्ट्रवादी युवक काँग्रेसच्यावतीने सोमवारी सकाळी मिरजकर तिकटी येथे पुतळ्याला चप्पल मारो आंदोलन करण्यात आले. जिल्हाध्यक्ष अमोल माने यांच्या नेतृत्वाखाली झालेल्या आंदोलनात परिचारक यांच्या निषेधाच्या घोषणा देण्यात आल्या. तसेच पुतळ्याला चप्पल मारुन संताप व्यक्त करण्यात आला.

याप्रसंगी आर. के. पोवार, आदिल फरास, अमोल माने यांनी भाषण करताना मुख्यमंत्र्यांनी परिचारक यांचा राजीनामा घ्यावा, अशी मागणी केली. आंदोलनामध्ये युवराज साळोखे, नागेश फराडे, किशोर माने, अनिल कदम, सुनिल देसाई, निरंजन कदम, सचिन लोहार, एहसान शेख, जयकुमार शिंदे, फिरोज सरगुर आदी सहभागी झाले होते.