जिजाऊ ब्रिगेडची तक्रार

म. टा. प्रतिनिधी, कोल्हापूर

जिल्हाधिकारी कार्यालयात काल पालकमंत्री चंद्रकांत पाटील यांच्या अध्यक्षतेखालील बैठकीत पुजारी व नगरसेवक अजित ठाणेकर यांनी अश्लील हावभाव करून महिलांचा विनयभंग केल्याचा तक्रारअर्ज शुक्रवारी जिजाऊ ब्रिगेडच्या कार्यकर्त्यांनी शाहूपुरी पोलिस ठाण्यात दिला. पुजारी ठाणेकर यांच्याविरोधात गुन्हा दाखल करावा असा आग्रह जिजाऊ ब्रिगेडने पोलिसांकडे धरला. मात्र, अपर पोलिस अधीक्षक सुहेल शर्मा यांच्याशी चर्चा केल्यानंतर तक्रार अर्ज दाखल करून ठाणेकर यांच्या अटकेची मागणी केली. तक्रारीच्या चौकशीनंतर पुढील कारवाईचे आश्वासन पोलिस निरीक्षक प्रवीण चौगुले यांनी दिले.

अंबाबाई मंदिरात देवीला घागरा-चोलीचा पोषाख परिधान केल्याच्या वादावर तोडगा काढण्यासाठी गुरूवारी जिल्हाधिकारी कार्यालयात बैठक झाली. पंढरपूरच्या धर्तीवर अंबाबाई मंदिरातील पुजाऱ्यांना हटवण्याचा आग्रह उपस्थित आंदोलकांनी धरला होता. यावेळी बैठकीला उपस्थित पुजाऱ्यांचे वर्तन गंभीर नसल्याचा आरोप करून ठाणेकर यांना सभागृहाबाहेर काढण्याचा आग्रह आंदोलकांनी धरला. पोलिस त्यांना बंदोबस्तात बाहेर घेऊन जात असताना ठाणेकर यांनी अश्लील आणि लज्जा उत्पन्न होईल असे वर्तन केल्याचा आरोप जिजाऊ ब्रिगेडने केला. याबाबत पोलिसांनी ठाणेकर यांच्यावर विनयभंगाचा गुन्हा दाखल करावा यासाठी जिजाऊ ब्रिगेड आग्रही होती. गुरूवारी रात्री शाहूपुरी पोलिस ठाण्यात गुन्हा दाखल करून घेण्यास टाळाटाळ झाल्याने महिला पदाधिकाऱ्यांनी शुक्रवारी दुपारी पोलिस अधीक्षक कार्यालयात, अप्पर पोलिस अधीक्षक सुहेल शर्मा यांची भेट घेतली. शर्मा यांनी तक्रार अर्ज देण्याची विनंती केल्यानंतर महिलांनी शाहूपुरी पोलिस ठाण्यात जाऊन तसा अर्ज दिला.

‘ठाणेकर यांनी बैठकीदरम्यान जाणीवपूर्वक महिलांसमोर अश्लील वर्तन केले. या कृतीची चौकशी करून ठाणेकर यांच्यावर तत्काळ गुन्हा दाखल करून अटक करावी’, अशी मागणी तक्रारदार डॉ. जयश्री चव्हाण यांनी केली आहे. ‘तक्रारीची चौकशी केल्यानंतर पुढील कारवाई केली जाईल’, अशी माहिती पोलिस निरीक्षक प्रवीण चौगुले यांनी आंदोलकांना दिली. यावेळी चारुशीला पाटील, आयेशा खान, सुवर्णा मिठारी, वैशाली जाधव, लता जगताप, सुनीता पाटील, सुनंदा चव्हाण, यांच्यासह दिलीप देसाई, चंद्रकांत पाटील, फिरोजखान उस्ताद आदी उपस्थित होते.