अ‍ॅपशहर

रस्ते अडवले मंडपांनी

गणेशोत्सवाच्या मंडपांसाठी शहरातील अनेक मंडळांनी रस्ते आणि पार्किंगच्या जागा अडवल्या आहेत. आधीच शहरात वाहतूक कोंडीचे प्रकार नेहमी पाहायला मिळतात. त्यातच आता मंडपांनी रस्ते अडू लागल्यामुळे कोंडीमध्ये भरच पडत जाणार आहे.

Maharashtra Times 25 Aug 2016, 3:00 pm
satish.ghatage@timesgroup.com
महाराष्ट्र टाइम्स.कॉम kolhapur ganesh mandal pendol blocked road
रस्ते अडवले मंडपांनी


गणेशोत्सवाच्या मंडपांसाठी शहरातील अनेक मंडळांनी रस्ते आणि पार्किंगच्या जागा अडवल्या आहेत. आधीच शहरात वाहतूक कोंडीचे प्रकार नेहमी पाहायला मिळतात. त्यातच आता मंडपांनी रस्ते अडू लागल्यामुळे कोंडीमध्ये भरच पडत जाणार आहे. बहुतांशी मंडळे विनापरवानाच मंडप उभारत आहेत. त्यांच्यावर ना जिल्हा प्रशासन कारवाईचा बडगा उगारतेय ना महापालिका किंवा पोलिस प्रशासन. रस्त्यावर मंडप उभारणाऱ्यांवर कारवाई करण्याचे धाडस न दाखवणारे पोलिस प्रशासन डॉल्बीवर कशी कारवाई करणार? असा प्रश्न यानिमित्ताने निर्माण झाला आहे.

गणेशोत्सवात मंडळांनी मंडप घातले आहेत. अॅम्ब्युलन्स, अग्निशमन दल अशा आपत्कालीन सेवेसाठीची वाहने सहजपणे जातील अशा पद्धतीने रस्ते सोडले नाहीत. उत्सवकाळात सामान्य वाहनधारकांचे कमालीचे हाल होणार आहेत. मंडळांच्या झुंडशाहीमुळे नागरिकांना तोंड बंद करून उत्सवकाळात ध्वनीप्रदूषण, रस्ते अडवणे असे प्रकार सहन करावे लागतात. सामान्यांची कुचंबणा लक्षात घेऊन हायकोर्टाने सार्वजनिक रस्ते, पार्किंगमध्ये मंडप घालण्यास परवानगी नाकारली आहे. पण मंडळांनी आदेश डावलून मंडप उभारले आहेत. अशा मंडळांवर कारवाई करण्याबाबत महापालिका आणि पोलिस प्रशासनही कच खात आहे. नियम धाब्यावर बसवून उत्सव करणाऱ्या अशा मंडळांच्या आरतीला मंत्री, आमदार, खासदार, प्रशासनातील मुख्य अधिकारी जातात. त्यामुळे पोलिसही कारवाई करण्यास धजत नाहीत. रस्त्यांवर बिनदिक्कत खड्डे पाडून मग परवानगीसाठी अर्ज केले जातात. मंडप परवानगीचे काम महापालिकेचे आहे, असे सांगून पोलिस महापालिकेकडे बोट दाखवतात. महापालिकाही रस्ते अडवणाऱ्यांवर कारवाईचे कागदी इशारे देत आहे. प्रत्यक्षात मंडळांविरोधात महापालिका किंवा पोलिस कायद्याचा बडगा उगारत नसल्याने मंडळाची भीड चेपली असून सर्वसामान्य हतबल झाले आहेत.

हायकोर्टाच्या आदेशानुसार कारवाई करण्याचे हाकारे पोलिस दलाकडूनही घातले जात आहेत. डॉल्बीमुक्त गणेशोत्सवासाठी पोलिस प्रशासनाकडून प्रबोधन सुरू आहे. पण जी मंडळे रस्ते अडवत आहेत त्यांच्यावर पोलिस कारवाई करत नाही. मग हजारोंच्या संख्येने डॉल्बीवर डोलणाऱ्यांवर काय कारवाई करणार, असा प्रश्न सर्वसामान्यांकडून विचारला जात आहे. जी मंडळे डॉल्बी लावणार आहेत त्यापैकी ७५ टक्के मंडळांनी अद्याप डॉल्बीमुक्त गणेश उत्सवाची घोषणा केलेली नाही. अशी मंडळे पोलिसांना माहीत असूनही त्यांच्यावर दबाव आणण्यासाठी पोलिस प्रशासन प्रयत्न करत नसल्याने यंदाही डॉल्बीमुक्त उत्सवाची केवळ हवाच असणार का असा प्रश्न व्यक्त होत आहे.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज