‘निराधार’ची मर्यादा वाढवा

कोल्हापूर ः संजय गांधी निराधार योजना, श्रावणबाळ आणि इंदिरा गांधी वृद्धापकाळ योजनेच्या वार्षिक उत्पन्नाची मर्यादा एकवीस हजारावरून पन्नास हजार करण्यात यावी, अशी मागणी आमदार चंद्रदीप नरके यांनी केली. ज्येष्ठ नागरिक धोरण जाहीर करुन मसूदा तयार करण्याबाबतची लक्षवेधी त्यांनी केली.

आमदार नरके म्हणाले की, शासनाकडून संजय गांधी निराधार योजना, श्रावणबाळ योजना, इंदिरा गांधी वृद्धापकाळ योजना असून लाभार्थ्यांना शासनाकडून पेन्शन दिली जाते. या योजनांमधील लाभार्थ्याची उत्पन्नाची मर्यादा रुपये एकवीस हजार आहे. योजनांतील वार्षिक उत्पन्न मर्यादा वाढवावी.

इंधन दरवाढ त्वरित मागे घ्या

महागाईने सर्वसामान्य माणसाचे कंबरडे मोडले असताना, पेट्रोल, डिझेल आणि गॅसमध्ये करण्यात आलेली दरवाढ सरकारने त्वरित मागे घ्यावी, अशी मागणी आमदार सतेज पाटील यांनी हिवाळी अधिवेशनात केली. पेट्रोल-डिझेलचे दर वाढल्यामुळे जीवनावश्यक वस्तूंच्या ‌किमतीही वाढल्या आहेत. त्यामुळे सामान्य माणसांचे हाल सुरु असल्याकडे त्यांनी सरकारचे लक्ष वेधले. जुलै २०१७ पासून पेट्रोल आणि डिझेलच्या किमतीत सुमारे ७ रुपये ३० पैसे वाढ झाली आहे. परिणामी पेट्रोल-डिझेलच्या किमती वाढल्याने पालेभाज्या, फळे, कडधान्य आणि इतर जीवनावश्यक वस्तूंचे दर गगनाला भिडले आहेत. मुळातच महागाईमुळे सामान्य जनता त्रस्त आहे. त्यामुळे पेट्रोल, डिझेल आणि गॅसमधील दरवाढ कमी करण्यात यावी, अशी मागणी आमदार सतेज पाटील यांनी केली.