म. टा. प्रतिनिधी, कोल्हापूर
करवीर निवासिनी अंबाबाई मंदिरात पगारी पुजारी नेमण्यासंबंधीच्या विधेयक हिवाळी अधिवेशनात बगल देण्यात आल्याचे स्पष्ट झाले आहे. तांत्रिक अडचणीमुळे हे विधेयक सादर होऊ शकल्याचे सांगितले जात आहे. अधिवेशन संपल्यानंतर १५ दिवसांत पुजारी नेमण्याबाबत सरकारच्यावतीने वटहुकूम काढण्याचे आश्वासन पालकमंत्री चंद्रकांत पाटील यांनी अंबाबाई मंदिरी पुजारी हटाओ संघर्ष समितीला दिले आहे. पालकमंत्र्यांनी आश्वासन न पाळल्यास आंदोलन तीव्र केले जाईल, असा इशारा समितीने दिला.
अंबाबाई मंदिरात पगारी पुजारी नेमणुकीचे विधेयक हिवाळी अधिवेशनात मांडले जाणार नसल्याची माहिती मिळताच समितीने तातडीने शनिवारी बैठक घेतली. बैठकीला माजी महापौर आर. के. पोवार, बाबा पार्टे, दिलीप पाटील, संजय पवार, विजय देवणे, प्रा. जयंत पाटील, अॅड. चारुलता चव्हाण, वसंतराव मुळीक, शरद तांबट उपस्थित होते. बैठकीची माहिती शिवसेना जिल्हाप्रमुख संजय पवार यांनी पत्रकाव्दारे प्रसिद्ध केली आहे. पत्रकात म्हटले आहे की, बैठकीतील सदस्यांनी पालकमंत्री पाटील यांच्याशी फोनवर संपर्क साधला. त्यावेळी पगारी पुजारी नेमणुकीविषयीचे विधेयक आणण्यात तांत्रिक अडचण असल्याने वेळेअभावी हे विधेयक अधिवेशनात आणलेले नाही, असे पालकमंत्री पाटील यांनी स्पष्ट केले. अधिवेशन संपल्यानंतर १५ दिवसानंतर अंबाबाई मंदिरात पगारी पुजारी नेमणुकीबाबत सरकारच्यावतीने वटहुकूम काढण्याचे आश्वासन त्यांनी दिले. पालकमंत्र्याच्या आश्वासनाची पूर्तता न झाल्यास आंदोलन तीव्र करण्याचा निर्धार बैठकीत करण्यात आला.
अंबाबाई मूर्तीला नऊ जून रोजी घागरा चोली नेसवल्यानंतर पुजारी हटाओची मागणी करत भाविकांनी आंदोलन केले होते. आंदोलनाची तीव्रता लक्षात घेऊन पालकमंत्री पाटील यांनी हिवाळी अधिवेशनात पगारी पुजारी नियुक्तीसंबधी आश्वासन दिले होते. अंबाबाई मंदिरात सरकारी पुजारी नियुक्तीचा ठराव ३१ ऑक्टोबरच्या मंत्रिमंडळ बैठकीत मंजूर करुन विधेयक हिवाळी अधिवेशनात मंजूर केले जाईल, असे आश्वासनही पाटील यांनी समितीला दिले होते.
फक्त अंबाबाई मंदिरासाठी स्वतंत्र कायदा
पंढरपूरप्रमाणे फक्त अंबाबाई मंदिरात पगारी पुजारी नियुक्तीचा स्वतंत्र कायदा करावा, अशी आमची मागणी आहे, असे विजय देवणे व दिलीप पाटील यांनी सांगितले. सरकारने पश्चिम महाराष्ट्र देवस्थान व्यवस्थापन समिती अंतर्गत येणाऱ्या सर्व मंदिरांचा एकत्रित विचार केल्यास हा कायदा पुन्हा रखडणार आहे, याकडेही त्यांनी लक्ष वेधले.