शिक्षकाचा अत्याचार, तरुणी विष प्यायली

तरुणीचा आत्महत्येचा प्रयत्न, प्रकृती गंभीर

म. टा. प्रतिनिधी, कोल्हापूर

शहरातील एका महाविद्यालयातील प्राध्यापकाकडून होणाऱ्या अत्याचाराला कंटाळून त्याच महाविद्यालयातील तरुणीने बुधवारी विष पिऊन आत्महत्या करण्याचा प्रयत्न केला. बुधवारी सकाळी दहा वाजण्याच्या सुमारास कळंबा तलाव येथे ही घटना घडली. प्रा. पंढरीनाथ कृष्णात पाटील (वय ३३, रा. कळंबा, ता. करवीर) असे या प्राध्यापकाचे नाव असून त्याच्यावर करवीर पोलिसांत गुन्हा दाखल झाला आहे. या पीडित तरुणीची प्रकृती गंभीर असून तिच्यावर खासगी रुग्णालयात उपचार सुरु आहेत.

प्रा. पाटील याची त्याच महाविद्यालयातील एका विद्यार्थींनीची ओळख झाली. त्यानंतर व्हॉटसअॅप, एसएमएसव्दारे ओळखीचे रुपांतर प्रेमात झाले. या प्रेमसंबंधाचा गैरफायदा घेत प्राध्यापकाने तरुणीला साकोली कॉर्नर येथे एका संस्थेच्या कार्यालयात आणि कळंबा तलाव येथे नेऊन अत्याचार केले. काही दिवसांनतर या तरुणीला हा प्राध्यापक विवाहित असून त्याला दोन मुली असल्याचे समजले. या कारणावरुन दोघांत सातत्याने वाद होऊ लागले. सतत होणाऱ्या वादाला कंटाळून तरुणीने आत्महत्या करण्याचा निर्णय घेतला.

बुधवारी प्रा. पाटील याला भेटण्यासाठी ही तरुणी सकाळी दहा वाजता कळंबा तलाव येथे आली. या ठिकाणी दोघांत वाद निर्माण झाला. वादानंतर तो प्राध्यापक निघून गेला. मात्र ती तरुणी याच ठिकाणी थांबली. या तरुणीने मोबाइलवरुन मित्र मैत्रीणींना आजअखेर झालेल्या घटना सांगितल्या. या प्रकाराचा त्रास होत असून आत्महत्या करीत असल्याचे तिने सांगितले. त्यानंतर काही वेळातच आपल्या सोबत आणलेले विषारी किटकनाशक तिने प्राशन केले. त्यानंतर मित्रमैत्रिणींनी पुन्हा तिच्याशी संपर्क साधण्याचा प्रयत्न केला, मात्र संपर्क होवू शकला नाही. दरम्यान, कळंबा तलाव परिसरात फिरण्यासाठी आलेल्या नागरिकांना ही तरुणी बेशुध्दावस्थेत पडल्याचे दिसले. या ठिकाणी तिची सॅक, मोबाइल, चिठ्ठी, विषाची बाटली आढळली. त्यांनी तत्काळ १०८ रुग्णवाहिकेला संपर्क करुन घटनेची माहिती दिली. तरुणीच्या मोबाइलवरुन मित्रांना संपर्क साधून सीपीआरमध्ये दाखल करीत असल्याचे सांगितले. प्रकृती गंभीर असल्याने तिला खासगी रुग्णालयात हलविण्यात आले.

सहा पानांची चिठ्ठी

संबंधित तरुणीने विष प्राशन करण्यापूर्वी सहा पानांची चिठ्ठी लिहून ठेवली आहे. त्यामध्ये प्रा. पाटीलने गेल्या महिन्यापासून अत्याचार केला आहे. तो सातत्याने भांडण करतो. अनेकदा धमकीही देतो, या सर्व प्रकारास कंटाळून आत्महत्या करीत असल्याचा उल्लेख आहे. या प्रकरणी प्राध्यापकावर आत्महत्येला प्रवृत्त करणे, अत्याचार या कलमानुसार गुन्हा दाखल केला आहे. पोलिसांनी त्याला दुपारी ताब्यात घेतले.