अ‍ॅपशहर

नाल्यांच्या भिंतीला खेटून बांधकामे

पंचगंगा नदीच्या पूरक्षेत्रामध्ये महापालिकेच्या नियमांना धुडकावत मोठे भराव टाकून बांधकामे केली जात आहेत.

Maharashtra Times 21 Sep 2017, 3:00 am
Udaysing.patil@timesgroup.com
महाराष्ट्र टाइम्स.कॉम kolhapur red zone enchronment
नाल्यांच्या भिंतीला खेटून बांधकामे

Tweet : @udaysingpatilMT

कोल्हापूर : पंचगंगा नदीच्या पूरक्षेत्रामध्ये महापालिकेच्या नियमांना धुडकावत मोठे भराव टाकून बांधकामे केली जात आहेत. त्याचबरोबर नदीला येऊन मिळणाऱ्या व उपनगरांतून मोठ्या प्रमाणावर पाणी वाहून आणणाऱ्या नाल्यांनाही बांधकामांचा विळखा पडत चालला आहे. नाल्यापासून नऊ ते पंधरा मीटरपर्यंत बांधकामे करता येत नसतानाही स्टार्म वॉटर नेटवर्कींग कामात बांधण्यात आलेल्या भिंतींमुळे थेट या भिंतीपासून बांधकामे करण्याचा घाट रचला जात आहे. त्यामुळे भविष्यात नाल्याच्या या भिंतीजवळ नवीन बांधकामे दिसतील.

रेड झोन निश्चित केला जात असताना ब्लू लाइन व रेड लाइन आखली जाते. त्यातून पुराची किमान व कमाल मर्यादा दाखवली जाते. या झोनमध्ये बांधकामांना परवानगीच नाही. पण या दोन्ही लाइन प्रत्यक्षात कुठे आहेत, हेच अनेक भागात स्पष्ट नसल्याने महापालिकेच्यावतीने बांधकामांना बिनभोबाटपणे परवानगी दिली जात आहे. ब्लू व रेड लाइनचा नेमका कोणता भाग, कुठून कुठेपर्यंत येतो हे महापालिकेच्या यंत्रणेने जाहीर करण्याची गरज आहे. अनेक भागात नियमित पूर आला तरी त्याचे पाणी येते. त्यामुळे हा भाग साहजिकच रेड लाइनच्या आतमध्ये येत असणार स्वा​भाविक आहे. पण अशा अनेक ठिकाणी बांधकामे करण्यात आली आहेत हे दिसत आहे.

महापालिकेने नेमलेल्या समितीने रेड झोनचा आराखडा तयार केला आहे. पण त्याची अंमलबजावणीसाठी कितपत वापर होतो, याबाबत साशंकताच आहे. नदीबरोबर नाल्यांच्या परिसरातही बांधकामांना मर्यादा आहे. छोटे नाले व मोठे नाले यांच्या परिसरात नऊ ते पंधरा मीटरनंतर बांधकाम करता येते. नाल्याच्या मध्यापासून हे अंतर मोजले जाते. पण अनेक नाल्यांला स्टार्म वॉटर नेटवर्किंगच्या कामातून उंच भिंती बांधण्यात आल्या आहेत. या भिंतींमुळे पाणी बाहेर पडणार नाही, अशी धारणा आहे. मात्र हा प्रकार सखल भागात धोकादायक ठरु शकतो, याची प्रचिती गेल्या आठवड्यात झालेल्या पावसामुळे आली. या भिंती नसताना नाल्याचे पाणी परिसरात पसरत होते. पण ते सर्व पाणी एकाच नाल्यात बंदिस्त केल्याने उताराकडे त्याचे प्रमाण जास्त होऊन त्या परिसरात पाण्याचा धोका होऊ शकतो. या भिंतींमुळे अगदी काठाबरोबर बांधकामे करण्याचा प्रयत्न भविष्यात केला जाण्याची शक्यता आहे.

तर व्यवस्था कोलमडणार

शहरातील पूरग्रस्त भागात पुराचा फटका बसतो. पण येथे टाकल्या जाणाऱ्या भराव व बांधकामामुळे नदीपलिकडील ग्रामीण भागातील पुराचे क्षेत्र वाढण्याची शक्यता आहे. सध्या मोठा पूर आला नसल्याने या बांधकामांबाबतचे गांभीर्य अजून पुढे आलेले नाही. ठराविक भागात तीन तासाच्या पावसाने कोट्यवधीचे नुकसान होऊ शकते.

नाल्यांना घातल्या भिंती

पाचगाव, राजेंद्रनगर, आयसोलेशन परिसर, बापट कॅम्प परिसर, उद्यमनगर, शाहूपुरी अशा विविध भागात नाल्यांना भिंती घातल्या गेल्या आहेत. शहराच्या काही भागात पूल बांधले जात असताना नळे टाकून सोपे काम केले असल्याचे दिसून आल्याने त्यामुळे साठणाऱ्या पाण्याचा फटका शेजारील वस्तीला कायम बसण्याची शक्यता आहे.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज