म. टा. वृत्तसेवा, सांगली
पोलिस कोठडीतील अनिकेत कोथळे खून प्रकरणातील सहा आरोपींना कोर्टाने गुरुवारी १५ दिवसांची न्यायालयीन कोठडी सुनावली. त्या सर्वांना कोल्हापूरच्या कळंबा कारागृहात धाडण्यात आले. दरम्यान, आरोपींनी आपल्या रक्ताचे, नखांचे, अक्षरांचे आणि लघवीचे नमुने देण्यास नकार दिल्याने याबाबत कोर्टात सुनावणी झाली. कोर्टाने दोन्ही बाजू ऐकून घेतल्यानंतर आरोपींचे म्हणणे फेटाळले. त्यामुळे सीआयडीला आरोपींकडून आवश्यक ते नमुने घेण्यातला अडसर दूर झाला आहे. कडेकोट पोलिस बंदोबस्त, आरोपींना पाहण्यासाठी झालेली गर्दीतूनच वाट काढत गुरुवारी अनिकेत कोथळे खून प्रकरणातील सहा आरोपींना घेऊन पोलिस अधिकाऱ्यांच्या गाड्यांचा ताफा कोर्टात दाखल झाला. आरोपींना कोर्टात हजर करताना बंदोबस्तावरील पोलिस अधिकारी, कर्मचाऱ्यांची धावपळ झाली. मुख्य न्याय दंडाधिकारी पी. पी. खापे यांच्यासमोर आरोपींना हजर करण्यात आले. सरकारी वकील जे. एस. डाके यांनी सीआयडीच्या वतीने युक्तिवाद केला. त्यानंतर आरोपींनी आपल्या रक्ताचे, नखांचे आणि अक्षरांचे नमुने देण्यास नकार दिला. तपासादरम्यान आम्ही काही केले नाही, आम्हाला काही माहीत नाही, या भूमिकेत असलेल्या आरोपींनी आवश्यक ते नमुने देण्यासही नकार दिल्याने यावर कोर्टात सुनावणी झाली. आरोपींचे वकीलपत्र घेण्यास कोणीही वकील पुढे न आल्याने सरकारच्या विधी व सेवा प्राधिकरणानेच त्यांना वकील दिला आहे. ते वकील आर. पी. पाटील यांनी आरोपींची बाजू मांडली. दोन्ही बाजू समोर आल्यानंतर कोर्टाने आरोपींचे म्हणणे फेटाळून लावले. अनिकेत कोथळे खूनप्रकरणी अटक झालेले बडतर्फ पोलिस उप निरीक्षक युवराज कामटे, हवालदार अनिल लाड, हवालदार अरुण टोणे, शिपाई नसरुद्दीन मुल्ला, चालक शिपाई राहुल शिंगटे आणि झीरो पोलिस झाकीर पट्टेवाले यांना पहिल्या टप्प्यात १३ आणि दुसऱ्या टप्प्यात दोन दिवसांची अशी एकूण १५ दिवसांची पोलिस कोठडी देण्यात आली होती. त्यामुळे गुरुवारी सीआयडीने आणखी पोलिस कोठडीची मागणी केली नाही. त्यामुळे कोर्टाने त्यांची रवानगी न्यायालयीन कोठडीत केली. दरम्यान, सांगलीच्या कारागृहात कैद्यांची संख्या जास्त आहे. त्याचबरोबर अनिकेत कोथळे प्रकरणातील साक्षीदार अमोल भंडारे आणि या पूर्वी युवराज कामटे याने तपास केलेल्या गुन्ह्यांतील संशयितही याच कारागृहात आहेत, त्यामुळे या आरोपींची अन्य ठिकाणच्या कारागृहात व्यवस्था करावी, अशी विनंती सांगली कारागृहाचे अधीक्षक सुशील कुंभार यांनी कोर्टाला केली होती. या पार्श्वभूमीवर कोर्टाने सहाही आरोपींना कोल्हापूरातील कळंबा कारागृहात हलवण्याचे आदेश दिले. न्यायालयीन कोठडीचा आदेश झाल्यानंतर आरोपींची गाडी काही वेळ सीआयडीच्या तपास कम्प परिसरात थांबवून ठेवली. त्यानंतर त्यांची वैद्यकीय तपासणी करून चोख पोलिस बंदोबस्तात त्यांची रवानगी कोल्हापूरकडे करण्यात आली. या वेळी कामटेसह इतर आरोपींच्या नातेवाईकांनीही आरोपींच्या गाडीजवळ जाण्याचा प्रयत्न केला. पण चोख बंदोबस्तांमुळे कोणालाही पुढे जाता आले नाही.