सनी पोवार खून खटल्याचा निकाल २७ जानेवारीला

कोल्हापूर ः पेठवडगाव येथील जगदीश उर्फ सनी प्रकाश पोवार (वय २२) या तरुणाचा पोलिसांच्या मारहाणीत कोठडीतच झालेल्या मृत्यूप्रकरणी तत्कालीन सहायक पोलिस निरीक्षक संजीव पाटील यांच्यासह चौघांवर ठपका ठेवण्यात आला होता. या खटल्यातील दोन्ही बाजुंचा युक्तीवाद गुरूवारी (ता. १९) झालेल्या सुनावणीत पूर्ण झाला आहे. अंतिम निकाल शुक्रवारी (ता. २७) अतिरिक्त सत्र न्यायाधीश एल. डी. बिले यांच्या कोर्टात होणार आहे.

केएमटी बसवर दगडफेक केल्याप्रकरणी पेठवडगाव पोलिसांनी सनी पोवार याला आंबेडकर चौकातून ताब्यात घेतले होते. सहायक फौजदार बबन शिंदे यांच्यासह अन्य पोलिसांनी त्याला कोठडीत बंद केल्यानंतर त्याच्या पोटात दुखू लागले. उपचारापूर्वीच त्याचा मृत्यू झाल्याचे डॉक्टरांनी सांगितल्यानंतर पोलिसांच्या मारहाणीतच सनी पोवार याचा मृत्यू झाल्याचा आरोप मृताच्या नातेवाईकांनी केला होता. तत्कालीन सहायक पोलिस निरीक्षक संजीव पाटील, सहायक फौजदार बबन शिंदे, पोलिस नईक धनाजी पाटील यांच्यावर झालेल्या या आरोपानंतर संशयितांवर खुनाचा गुन्हा नोंद करण्यात आला होता. जिल्हा सत्र न्यायालयात या खटल्याचे कामकाज पूर्ण झाले. बचाव पक्षाच्या वतीने अॅड. हर्षद निंबाळकर आणि अशोक राणे यांनी काम पाहिले, तर सरकार पक्षामार्फत अॅड. अशोक रणदिवे यांनी काम पाहिले.