सीमोल्लंघन
ऐतिहासिक दसरा चौक येथे श्रीमंत छत्रपती शाहू महाराज यांच्या हस्ते शमीपूजन करून सीमोल्लंघन करण्यात आले. यावेळी राज्याचे उच्च व तंत्र शिक्षण मंत्री चंद्रकांत पाटील , पद्मश्री डी वाय पाटील यांच्यासह अनेक प्रमुख मान्यवरांनी या सोहळ्याला उपस्थिती लावली होती. यंदा पहिल्यांदाच या महोत्सवामध्ये शासनाचा सहभाग असल्याने शाही लवाजम्यासह हा शाही दसरा पार पडला.
शाही दसरा सोहळा
छत्रपतींची राजधानी असणाऱ्या करवीर नगरीत पारंपरिक विजयादशमीचा शाही दसरा सोहळा ऐतिहासिक दसरा चौकात दिमाखात साजरा झाला.दसरा सोहळ्यामध्ये श्री शाहू महाराज छत्रपती यांच्या हस्ते शमीपूजन झाले. यानंतर छत्रपतींच्या कुटुंबातील युवराज संभाजीराजे छत्रपती, मालोजीराजे छत्रपती, शहाजीराजे छत्रपती, यशराजराजे छत्रपती व यशस्विनीराजे छत्रपती यांनी सोने लुटताच करवीरवासियांनी अपूर्व उत्साहात सीमोल्लंघन करुन सोने लुटले.
दसरा चौकाचा परिसर
आनंद, उत्साह आणि परंपरेचा बाज जपत दसऱ्याचा सोहळा पार पडला. दसरा चौकात झालेल्या या सोहळ्यास करवीरवासीयांनी उपस्थिती लावून या परंपरेशी आपला पिढ्यान्पिढ्याचा असलेला संबंध अधिक दृढ केला. या वेळी चैतन्यदायी गर्दीने दसरा चौकाचा परिसर फुलून गेला. हा सोहळा पाहण्यासाठी सायंकाळी पाच वाजल्यापासूनच लोकांनी गर्दी केली होती.
मेबॅक मोटार
तत्पूर्वी करवीर निवासिनी अंबाबाई(श्री महालक्ष्मी), जुन्या राजवाड्यातील तुळजाभवानी आणि गुरु महाराज यांच्या पालख्यांचे लवाजम्यासह आगमन झाले. यानंतर श्रीशाहू महाराज छत्रपती व कुंटुंबातील सदस्यांचे परंपरागत पध्दतीने ऐतिहासिक मेबॅक मोटारीतून दसरा चौकात आगमन झाले. यावेळी पोलीस विभाग व टी.ए. बटालियनच्या बँड पथकाने करवीर संस्थानचे गीत वाजवून त्यांचे स्वागत केले.
शाही लवाजम्यात भव्य मिरवणुक
यंदा कोल्हापूरच्या शाही दसरा सोहळ्यात राज्य शासनाने ही सहभाग घेतल्याने शासनाच्या वतीने जोरदार तयारी करण्यात आली होती. छत्रपती घराण्याची मिरवणूक ही शाही पद्धतीने निघावी यासाठी शासनाने नियोजन केले होते आणि या नुसारच रॅलीत सजवलेले उंट, मावळ्यांच्या वेशभूषेतील घोडेस्वार, शिवकालीन युद्धकलांची व मर्दानी खेळांची प्रात्यक्षिके, इतिहासाच्या स्मृती जागवणारे पोवाडे, पारंपरिक पद्धतीने निघालेल्या देवीच्या पालख्या अशा शाही लवाजम्यात निघालेल्या मिरवणुकीने उपस्थित नागरिकांचे लक्ष वेधून घेतले.
शहरात एलईडी स्क्रीन
मिरवणुकीत सामाजिक संदेश देणारे चित्ररथ तसेच तालमींचे कुस्तीगीर सहभागी झाले होते. तर रस्त्याच्या दुतर्फा एनसीसीचे विद्यार्थी उभे होते. तसेच नागरिकांना शाही दसरा महोत्सव सोहळा पाहता यावा यासाठी शहरात विविध ठिकाणी एलईडी स्क्रीन लावण्यात आल्या होत्या.