म. टा. प्रतिनिधी, कोल्हापूर
पुलाची शिरोली (ता. हातकणंगले) येथील गायरानात वीटभट्टी मालकाचा खून केल्याचे दोषारोपपत्र सिद्ध झाल्याने कामगार उमेश सुरेश सोनवणे (वय ३५, रा. आरंडोल, जि. जळगाव) याला जन्मठेप आणि पाच हजार रुपये दंडाची शिक्षा कोर्टाने ठोठावली. जिल्हा व सत्र न्यायाधीश पी. एम. नागलकर यांनी शनिवारी हा आदेश दिला.
या खटल्याची माहिती अशी, निवास यशवंत मोहिते (४०, रा. पुलाची शिरोली, ता. हातकणंगले) यांचा वीटभट्टीचा व्यवसाय होता. या वीटभट्टीवर आरोपी उमेश सोनवणे हा कामगार होता. ११ जानेवारी २०१५ रोजी पगाराच्या कारणावरुन मालक मोहिते आणि कामगार सोनवणे यांच्यात वाद झाला. संतापलेल्या सोनवणेने वीटभट्टीच्या ठिकाणीच मोहिते यांचा गळा दाबून उचलून आपटून ठार मारले. नंतर पुरावा नष्ट करण्यासाठी मृतदेह त्यांच्या कारमध्ये ठेवला. ही कार दावणगिरी तालुक्यातील कोगन्नूर गावच्या हद्दीत महामार्गालगत १०० फुटांवरून दरीत सोडून दिली.
या प्रकरणाचा तपास शिरोली एमआयडीसी पोलिसांनी केला. तपासात खून सोनावणेने केल्याचे उघड झाले. खटल्याचे काम जिल्हा व सत्र न्यायाधीश नागलकर यांच्यासमोर चालले. तत्कालीन सरकारी वकील एस. एम. पाटील, विशेष सरकारी वकील विवेक शुक्ल यांनी काम पाहिले. सहायक सरकारी वकील अमित महाडेश्वर यांचा युक्तिवाद, परिस्थितीजन्य पुराव्यामधून आरोपी सोनवणेने मोहिते यांचा खून केल्याचे निष्पन्न झाले. त्यानुसार कोर्टाने आरोपीला शिक्षा ठोठावली. अॅड. झेबा पठाण, गजानन कोरे, बी. डी. सूर्यवंशी, सहायक पोलिस निरीक्षक संदीप अबिटकर, अशोक माने यांचे खटल्यासाठी सहकार्य लाभले.