कोल्हापूर टाइम्स टीम
लहान मुलांचा थक्क करायला लावणारा नृत्याविष्कार, मराठमोळ्या संस्कृतीचे दर्शन घडविणाऱ्या लोकगीत व लोकनृत्यांचा अनोखा थाटमाट आणि तरुणाईचा हटके परफॉर्मन्स अशा कलागुणांनी 'हॅपी स्ट्रीट'चे व्यासपीठ फुलले. विविध कलाप्रकाराच्या सादरीकरणासाठी हक्काचे व्यासपीठ ठरलेल्या 'हॅपी स्ट्रीट'वर गिटारवादन, गायन, मिमिक्रीद्वारे कोल्हापुरातील तरुण कलाकारांचे टॅलेंटही उजळले. सायबर रोडवर रंगलेल्या 'हॅपी स्ट्रीट'मध्ये कलाविष्काराची उधळण झाली.
फर्स्ट फाऊंडेशनच्या कलाकारांनी, 'या कोल्हापूरची शान आई तुझं देऊळ' या लोकगीतातून करवीर निवासिनी अंबाबाई देवीचा महिमा गायिला. लोकगीताच्या धमाकेदार सादरीकरणानंतर कार्यक्रमाची रंगत आणखी वाढली. राजेंद्रनगर येथील ऑक्सफर्ड इंग्लिश मिडियम स्कूलच्या विद्यार्थ्यांचा सामूहिक नृत्याविष्कार, डीआयडी फाऊंडेशमधील तीन ते पाच वर्षाच्या मुलांनी ग्रुप डान्स, सर्वेश गुजरचा सोलो डान्सने टाळया वसूल केल्या.
नव्या कल्याणकरचा लेसा डान्स, अखिलेश सरनाईकने 'मुकाबला ओ मुकाबला' गीतावर सादर केलेल्या दिलखेचक नृत्याला उपस्थितांनी शिट्ट्या, टाळ्यांचा वर्षाव करत दाद दिली. अपूर्वा पाटीलचे इंग्लिश गाणे, किमया जोशीचे नृत्य हे वेगळेपण ठरले. रुद्रांक्ष अॅकेडमीच्या कलाकारांनी बहारदार नृत्य करत वाहवा मिळवली. स्पर्श अॅकेडमीच्या कलाकारांनी 'याड लागलं' या गाण्यावर नृत्य केले. ओंकार चौगुले व पूनम पोवारने यांचा कलाविष्कार, ठग्ज नाइन क्रू, हिप हॉपर्स क्रू आणि मॅडीज डीआयडी फिटनेस अॅकेडमीतर्फे हटके परफॉर्मन्स झाले. समीक्षा हंबीरचा सोलो डान्स आणि नंदनवन कॉलनी येथीलक्लेवर प्ले स्कूलच्या विद्यार्थ्यांचा 'हवा हवाई' गीतावरील नृत्याने करमणूक झाली. व्ही. डान्सलिंग बॉट स्टुडिओ यांचा हिपॉप डान्स, सुशांत साजणीकर यांचा रॅप साँग अशा वेगवेगळ्या कार्यक्रमामुळे 'हॅपी स्ट्रीट'मधील रंगत वाढत गेली.
भरतनाट्यम् ते गिटारवादन
अस्सल भारतीय नृत्यप्रकार समजल्या जाणाऱ्या भरतनाट्यमचे विलोभनीय सादरीकरण हे वेगळे आकर्षण ठरले. प्राची कल्याणकर, वरदा चौगुले यांनी हा नृत्यप्रकार सादर केला. भावमुद्रा, ताल आणि पदलालित्याचा योग्य समन्वय राखत त्यांनी हा नृत्यप्रकार फुलविला. राज भोसले यांच्या गिटारवादनाने उपस्थितांना प्रभावित केले.
गिर्यारोहक कस्तुरी सावेकरला शुभेच्छा
कोल्हापुरची युवा गिर्यारोहक कस्तुरी सावेकर येत्या मार्च महिन्यात जगातील सर्वात उंच समजल्या जाणारे माऊंट एव्हरेट शिखर सर करणार आहे. वयाच्या १८व्या वर्षी हा शिखर सर करून माऊंट एव्हरेस्टवर तिरंगा ध्वज फडकााविण्यची जिद्द बाळगून आहे. २४ मार्च रोजी ती कोल्हापुरातून रवाना होणार आहे. तर २८ मार्चपासून प्रत्यक्ष चढाईला सुरुवात होणार आहे. या कामगिरीसाठी तिला 'महाराष्ट्र टाइम्स'तर्फे शुभेच्छा दिल्या. जिल्हाधिकारी दौलत देसाई यांच्या हस्ते बुके देऊन सदिच्छा व्यक्त केल्या.