सांगली :
मलेशियातील नोकरीचे अमीष दाखवून गंडा घातल्याप्रकरणी रविवारी अटक केलेल्या धीरज पाटील याला कोर्टाने सोमवारी दहा दिवसांची पोलिस कोठडी सुनावली. फसवणुकीचा गुन्हा दाखल होताच पसार झालेला धीरज पाटील मलेशियाची वारी करून आल्याची माहिती पुढे येत आहे.
सांगली पोलिसांनी पुणे परिसरातील चतुश्रृंगी परिसरात डॉग शोच्या ठिकाणी धीरज पाटील याला अटक केली होती. त्याच्याकडील प्राथमिक चौकशीत तो स्वतः मलेशियात वेटर म्हणून काही दिवस काम करीत होता. त्यावेळी संपर्कात आलेल्यांच्या ओळखीच्या आधारे त्याने हॉटेल मॅनेजरपदाच्या नोकरीचे अमिष दाखवून मलेशियातील हॉटेल व्यावसायिकांना वेटर मिळवून देण्याचा उद्योग सुरू केला. स्थानिक पातळीवर कौस्तुब पवार गरजू तरुणांना गाठून धीरज पाटीलपर्यंत आणून सोडायचा आणि पुढे धीरज पाटील मलेशियातील जीवा नावाच्या केरळच्या व्यक्तीच्या मदतीने हे रॅकेट चालवायचा, अशी माहिती पुढे आली आहे. पाटीलने मलेशियात जावून नेमके काय केले, कोणाची भेट घेतली याची चौकशी शहर पोलिस ठाण्याकडील पोलिस उपनिरीक्षक समीर चव्हाण करीत आहेत.