आंबा झाला स्वस्त

म. टा. प्रतिनिधी, कोल्हापूर

एक ते दीड हजार रूपयांच्या घरात असलेल्या आंबा पेटीचा दर आता सर्वसामान्यांच्या आवाक्यात आला आहे. रत्नागिरी हापूस, देवगड, कर्नाटक हापूस स्वस्त झाला असून देवगड हापूसचा दर २०० रूपये डझन असा झाला आहे. तर रत्नागिरी हापूसच्या ५ ते ६ डझन पेटीचा दर ५०० ते ८०० रूपये झाला आहे. रत्नागिरी, देवगड आणि कर्नाटकातून आंब्याची आवक मोठ्या प्रमाणात वाढल्याने आंबा स्वस्त झाला आहे.

गेल्या महिन्यात आंबा पेटीचा एक ते दीड हजार रूपयांच्या घरात होता. या आठवड्यात आंब्याची आवक मोठ्या प्रमाणात वाढली आहे. बाजारपेठेत दररोज दहा हजार बॉक्सची आवक होत आहे. यामध्ये रत्नागिरी हापूस, देवगड, कर्नाटक हापूस आणि लालबाग आंब्याची मोठी आवक झाली आहे. पर्यायाने आंबा पेटी दरात घसरण झाली आहे. देवगड हापूसचे २० ते ३० नग २०० ते ४०० रूपयांपर्यंत विक्री केले जात आहेत. रत्नागिरी पायरी १०० रूपये प्रति डझनचा दर झाला आहे. परराज्यातील आंब्याची मोठ्या प्रमाणात आवक झाल्याने रत्नागिरी, देवगड, मालवणच्या हापूस आंब्याच्या पेटीच्या दरात गेल्या महिन्याच्या तुलनेत ७०० ते ८०० रूपयांची घसरण झाली आहे. त्यामुळे एक डझन आंब्याचा दर १०० रूपयांपासून ते २०० रूपयांपर्यंत कमी झाला आहे. अवकाळी पावसामुळे कोकणातील आंबा उत्पादन कमी झाले होते. परिणामी प्रचंड दरामुळे हा कोकणाचा राजा सामान्यांच्या आवाक्याबाहेर होता. रत्नागिरी हापूसची पेटी ८०० ते २००० रुपयापर्यंत होती तर रत्नागिरी पायरीची पेटी ७०० ते १२०० रुपयांना उपलब्ध होत होती. देवगड हापूस पेटी मात्र ९०० ते २२०० रुपये इतक्या सर्वात जास्त दरात उपलब्ध होती. आवक मोठ्या प्रमाणात झाल्याने फळांच्या दरात घसरण झाली आहे. त्यामुळे बाजारपेठांसह उपनगरातही टेम्पोतून आंबा पेटीची विक्री होत आहे. सध्या बाजारपेठेत कर्नाटक, आंध्रप्रदेश, केरळ व गुजरातमधील आंब्याची आवक मोठ्या प्रमाणात सुरू झाली आहे. त्याचे दर १०० ते ४०० रुपयांपर्यंत आहेत.