म. टा. प्रतिनिधी, कोल्हापूर
'आगामी निवडणुकीत महापालिकेवर भाजपचा झेंडा फडकावला जाईल,' अशी घोषणा माजी खासदार महाडिक यांनी केली. महाडिक यांच्या उपस्थितीत गुरुवारी महापालिकेत विरोधी पक्षनेते विजय सूर्यवंशी यांच्या कार्यालय प्रवेशाचा कार्यक्रम झाला. त्यानंतर 'भाजप सर्व प्रभागांत निवडणूक लढविण्यासाठी चाचपणी करत आहे. थेट पाइपलाइन योजनेचा प्रलंबित प्रश्न भाजपच्या महापौरांच्या कारकीर्दीतून पूर्ण करून शहरवासियांना स्वच्छ, मुबलक पाणी देऊ,' असा दावाही महाडिक यांनी पत्रकारांशी बोलताना केला.
माजी खासदार महाडिक म्हणाले, 'गेल्या निवडणुकीत भाजपला चार ते पाच जागा कमी पडल्या. यावेळी आम्ही सर्व प्रभागांत निवडणूक लढविण्यासाठी चाचपणी करत आहोत. देशात पंतप्रधान नरेंद्र मोदींनी धाडसी निर्णय घेतले असल्याने जनता भाजपला मतदान करेल. राज्यात महायुती सरकारच्या काळात तत्कालीन मुख्यमंत्री देवेंद्र फडणवीस आणि पालकमंत्री चंद्रकांत पाटील यांनी शहरातील प्रलंबित कामांना गती दिली. विकासकामांसाठी मोठ्या प्रमाणावर निधी उपलब्ध करुन दिला.'
'थेट पाइपलाइनचा प्रश्न नऊ वर्षे प्रश्न प्रलंबित आहे', असा आरोप करत महाडिक म्हणाले, 'सत्ताधारी आघाडीने गेल्या पाच वर्षांत हा प्रश्न सोडवण्याची गरज होती. योजना पूर्ण कधी होईल याचा पत्ता नाही. पुढील निवडणुकीत भाजपची सत्ता आल्यावर महापौर आमचाच होईल. त्यानंतर योजना पूर्ण करुन कोल्हापूर शहराला स्वच्छ पाणी दिले जाईल.' यावेळी भाजप, ताराराणी आघाडीचे नगरसेवक, भाजप पदाधिकारी, कार्यकर्ते उपस्थित होते.