कोल्हापूर: जिल्ह्यातील ग्रामपंचायत स्तरावर जैवविविधता व्यवस्थापन समितीची स्थापना केली आहे. या समितीअंतर्गत लोक जैव विविधता नोंदवही तयार करण्याची कार्यवाही सुरू आहे. त्या अनुषंगाने तांत्रिक गटाची स्थापना करण्यासाठी मंगळवारी (ता. १०) पर्यावरणप्रेमी कार्यकर्त्यांची जिल्हा परिषदेत बैठक होणार आह. जि. प. मधील 'स्वर्गीय वसंतराव नाइंर्क सभागृह' येथे दुपारी चार वाजता बैठक आयोजित केली आहे. कृषीशास्त्र, प्राणीशास्त्र, वनस्पतीशास्त्र, पशुवैद्यशास्त्र, वन, वन्यजीव, पर्यावरण व जैवविविधतेशी संबंधित तज्ज्ञांनी, अभ्यासकांनी व्यक्तीगत माहितीसह (बायोडाटा) उपस्थित राहावे. जैव विविधता नोंदवही तयार करण्यासाठी जिल्ह्यातील ज्या स्वयंसेवी संस्थेकडे मनुष्यबळ आहे अशा संस्था यामध्ये सहभागी होऊ शकतात. ते बैठकीत आजवर केलेल्या कामाचे सादरीकरण करू शकतात. अधिक माहितीसाठी उपमुख्य कार्यकारी अधिकारी ग्रामपंचायत विभाग, उपवनसंरक्षक कोल्हापूर वनविभाग यांचे कार्यालय येथे संपर्क साधावा, असे आवाहन केले आहे.
मंगळवारी बैठक
जिल्ह्यातील ग्रामपंचायत स्तरावर जैवविविधता व्यवस्थापन समितीची स्थापना केली आहे...
महाराष्ट्र टाइम्स.कॉम 5 Dec 2019, 4:00 am