म्हैसाळप्रकरणात आणखी दोघांना अटक

मिरज ः म्हैसाळ (ता. मिरज) येथील गर्भलिंग तपासणी आणि भ्रूणहत्यांप्रकरणी संदीप जाधव (वय ३०) रा. शिरढोण, ता. शिरोळ आणि विरगोंड उर्फ बंडू गोमटे (वय ३२), रा. कागवाड या दोन एजंटना रविवारी मिरज पोलिसांनी अटक केली. सोमवारी या दोघांना न्यायालयासमोर हजर केले असता दोघांनाही तीन दिवसांची पोलीस कोठडी सुनावण्यात आली आहे.

दरम्यान, याप्रकरणी अटकेत असलेले डॉ. रमेश देवगीकर (विजापूर), डॉ. श्रीहरी घोडके (कागवाड ), सुनील खेडकर (माधवनगर), उमेश साळुंखे (नरवाड) आणि कांचन रोजे (शेडबाळ) या पाचजणांच्या पोलिस कोठडीत तीन दिवसांची वाढ करण्यात आली आहे.

रविवारी ताब्यात घेतलेले संदीप जाधव आणि बंडू गोमटे या प्रकरणातील मुख्य संशयित आरोपी डॉ. बाबासाहेब खिद्रापुरे याचे एजंट म्हणून काम करीत असल्याचे चौकशीत पुढे आले आहे. या दोघांच्या अटकेमुळे याप्रकरणी अटक करण्यात आलेल्यांची संख्या अकरावर पोहोचली आहे.

पाच स्वतंत्र पथके

दरम्यान, या प्रकरणाचा तपास करण्यासाठी पाच स्वतंत्र प‌थके तयार करण्यात आली आहेत. तसेच सात अधिकारी आणि वैद्यकीय अधिकाऱ्यांचे स्वतंत्र पथकही चौकशी करत आहे. त्यामुळे प्रकरणाची व्याप्ती आणखी वाढण्याची शक्यता आहे.