कोल्हापूर टाइम्स टीम
येथील जिल्हाधिकारी कार्यालयातर्फे आयोजित जागतिक अल्पसंख्याक हक्क दिन कार्यक्रमाचा मंगळवारी फज्जा उडाला. शाहू स्मारक भवनात झालेल्या कार्यक्रमाकडे बहुसंख्य अल्पसंख्याकांनी पाठ फिरवल्याने शालेय विद्यार्थ्यांना आणून बसवावे लागले. अतिरिक्त जिल्हाधिकारी नंदकुमार काटकर अध्यक्षस्थानी होते.
मुस्लिम, ख्रिश्चन, जैन अशा अल्पसंख्याक समाजासाठीच्या सरकारी योजनांच्या जागृतीसाठीचा कार्यक्रम सकाळी ११.३० वाजता सुरू झाला. विविध अल्पसंख्याक समाजातील स्वयंसेवी संस्थांच्या पदाधिकाऱ्यांनी मागण्याचे निवेदन काटकर यांच्याकडे दिले. दरम्यान, गेल्या वर्षी झालेल्या कार्यक्रमात अल्पसंख्याकासाठीच्या योजनांची पुस्तिका प्रसिद्ध करण्याचे आश्वासन दिले होते. मात्र ते आम्ही पूर्ण करू शकलो नाही, असे काटकर यांनी भाषणात सांगितले. ते म्हणाले, 'समाजातील सर्व अल्पसंख्याकांनी संघटित झाले पाहिजे. सरकारवर अवलंबून न राहता, स्वावलंबी होण्यासाठी प्रयत्न केले पाहिजे.
सुनीता खंजिरे म्हणाल्या, 'आमची स्वयंसेवी संस्था जैन समाजातील महिलांच्या विविध प्रश्नांवर काम करते. सरकारकडून कोणत्याही प्रकारचा निधी मिळत नसताना लोकवर्गणीतून विविध विधायक कामे केली जातात. सरकारने निधी दिल्यास व्यापक काम करता येईल. प्रत्येक अल्पसंख्याक समाजाने वेगवेगळे काम करण्याऐवजी संघटीत झाल्यास मागण्यांसाठी सरकारकडे पाठपुरावा करणे सोपे होईल.'
जैन समाजाचे अध्यक्ष अनिल गडकरी यांचे भाषण झाले. जिल्हा कौशल्य विकास रोजगार व उद्योजकता मार्गदर्शन केंद्राचे सहायक संचालक जमीर करीम, मुस्लिम ओबीसी संघटनेचे अध्यक्ष जहांगीर हजरत, राजर्षी शाहू मुस्लिम वेलफेअर फांउडेशनचे अध्यक्ष दस्तगीर मुल्ला, सेंट एज्युकेशनचे अध्यक्ष पीटर डिसोझा, उषा सरदेसाई आदी उपस्थित होते. नायब तहसीलदार प्रकाश दगडे यांनी आभार मानले.