म. टा. वृत्तसेवा, मिरज
पीडित विवाहितेवर बलात्कार प्रकरणात शहर पोलिसांच्या पोलिस कोठडीत असलेले मुख्य आरोपी अमित कुरणेसह वडील अण्णासाहेब कुरणे आणि आई सुनीता कुरणे यांना न्यायालयीन कोठडीत सुनावण्यात आली आहे. मंगळवारी त्यांची पोलिस कोठडी संपल्याने तिघांना मिरज कोर्टात हजर करण्यात आले होते. कुरणे दाम्पत्याने जामिनासाठी सांगली सत्र न्यायालयात जामीन अर्ज दाखल केला आहे.
पीडित विवाहितेवर बलात्कार आणि तिला आत्महत्येस प्रवृत्त्त केल्याप्रकरणी अमित कुरणे, त्याचे वडील अण्णासाहेब कुरणे आणि आई सुनीता कुरणे यांना अटक करण्यात आली होती. आत्महत्येस प्रवृत्त केल्याप्रकरणी न्यायालयाने बारा दिवसांची पोलीस कोठडी सुनावली होती. पुन्हा बलात्कार प्रकरणात मुख्य आरोपी अमित कुरणेला आठ दिवस आणि कुरणे दांपत्याला चार दिवसांची पोलिस कोठडी सुनावली. मंगळवारी तिघांची पोलिस कोठडी संपल्यानंतर त्यांना पंधरा दिवसांच्या न्यायालयीन कोठडीत रवानगी करण्यात आली. कुरणे कुटुंबाला न्यायालयीन कोठडी मिळताच अण्णासाहेब कुरणे आणि सुनीता कुरणे या दोघांनी जिल्हा सत्र न्यायालयात जामिनासाठी अर्ज दाखल केला आहे. बचाव पक्षाकडून बुधवारी युक्तीवाद केला जाणार आहे. अमित कुरणेलाही न्यायालयीन कोठडी मिळाल्याने तो फरारी असताना त्याला मदत करणारे तसेच त्याच्या संपर्कात असणाऱ्या व्यक्तींचा तपास थांबणार का? अशी भीती पीडितेच्या नातेवाईकांनी व्यक्त केली आहे. तर, तपासाबाबत शहर पोलिसांच्या भूमीकेबाबत पुन्हा एकदा संशयकल्लोळ निर्माण होत आहे.