म. टा. वृतसेवा, हातकणंगले
'आमदार डॉ. सुजित मिणचेकर यांनी नऊ वर्षांच्या कालावधीत कोट्यवधी रुपयांच्या विकासकामांचा डोंगर उभारला आहे. सर्व राजकीय पक्षांत आदराचे स्थान निर्माण केल्याने येत्या विधानसभा निवडणुकीत ते निश्चितच हॅटट्रीक करणार,' असे प्रतिपादन पालकमंत्री चंद्रकांत पाटील यांनी केले.
हुपरी (ता. हातकणंगले) येथे आमदार मिणचेकर यांच्या वाढदिवसानिमित्त आयोजित 'मराठी तडका' या मनोरंजनात्मक कार्यक्रमाच्या उद्घाटनप्रसंगी पाटील बोलत होते. खासदार धनंजय महाडिक, नगराध्यक्षा जयश्री गाट, महावीर गाट, आमदार सुधीर खाडे, लेखा मिणचेकर, जिल्हा परिषद सदस्य प्रविण यादव, संजय चौगुले, संजय पाटील, संभाजी हांडे आदी उपस्थिती होते.
खासदार धनंजय महाडिक म्हणाले, 'डॉ. मिणचेकर हे राजकारणात असूनदेखील अजातशत्रू व्यक्तिमत्त्व आहेत. असे दुर्मीळ राजकीय नेते क्वचितच आढळतात.'
यावेळी नगराध्यक्षा जयश्री गाट,प्रविण यादव आदीची भाषणे झाली. दरम्यान, सोमवारी आमदार मिणचेकर यांच्या हातकणंगले येथील संपर्क कार्यालयाचे उद्घाटन सार्वजनिक बांधकाम मंत्री एकनाथ शिंदे यांच्या हस्ते करण्यात आले. यावेळी सार्वजनिक बांधकाम मंत्री एकनाथ शिंदे म्हणाले, 'कोल्हापूर जिल्ह्यात आगामी विधानसभेच्या निवडणुकीत जिल्ह्यात भगवा फडकण्यासाठी शिवसैनिकांनी तयार राहावे. राज्यात शिवसेनेचे सरकार व कोल्हापूर जिल्ह्यात सर्वच विधानसभेवर भगवा फडकवावा.'
यावेळी डॉ.सुजित मिणचेकर यांचा सत्कार सार्वजनिक बांधकाम मंत्री शिंदे यांच्या हस्ते करण्यात आला. सत्काराला उत्तर देताना आमदार मिणचेकर म्हणाले, 'मी शिवसेनेचा पाईक असून शिवसेनेमुळे मला आमदार म्हणून जनतेची कामे करणाची संधी मिळाली आहे. या संधीचा जनतेच्या विकासासाठी वापर केल्याशिवाय राहणार नाही.'
यावेळी अनेक कार्यकर्त्यांनी डॉ. मिणचेकर यांना मंत्रिमंडळ विस्तारात स्थान मिळावे, अशी मागणी मंत्री शिंदे यांच्याकडे केली. जिल्हा परिषद सदस्य प्रवीण यादव, संजय चौगुले, उद्योगपती गणेश भांबे, शितल केटकाळे, संजय गांधी तालुका कमिटीचे अध्यक्ष महेश चव्हाण, बाबासाहेब शिंगे, संग्रामसिंह नाईक, बापू मुसळे, सत्यजित तोरस्कर, गटविकास अधिकारी अरविद धरणगुतीकर, धोंडीराम कोरवी, सुवर्णा जाधव उपस्थित होते. मिणचेकर यांना शुभेच्छा देण्यासाठी कोल्हापूर, सांगली जिल्ह्यातील अनेक कार्यकर्ते, राजकीय पक्षांच्या नेत्यांची गर्दी झाली होती. मिणचेकर यांनी शुभेच्छा म्हणून अनेक तरुण मंडळांच्यावतीने वह्या भेट देण्यात आल्या.
हातकणंगले : आमदार डॉ. सुजित मिणचेकर यांच्या संपर्क कार्यालयाचे उद्घाटन करताना सार्वजनिक बांधकाम मंत्री एकनाथ शिंदे. शेजारी आमदार मिणचेकर, लेखा मिणचेकर, सार्थ मिणचेकर, संजय चौगुले, प्रविण यादव, संजय पाटील आदी.