मित्रालाच ठार मारण्याची धमकी; मनसे वाहतूक सेना जिल्हाध्यक्षावर गुन्हा दाखल

म. टा. प्रतिनिधी, कोल्हापूरः खाजगी सावकारीतून व्याजाने घेतलेल्या पाच लाख रुपयांच्या मोबदल्यात प्रवीण बाळकृष्‍ण पाटील (वय ४८, रा.संकल्प बी-१ शेवंतीपार्क, पाचगाव, ता. करवीर) यांच्याकडून व्याजासह १० लाख रुपये व दोन फायनान्स कंपनीच्या खात्यावर १० लाख रुपये भरावयास लावूनही आणखी ४ लाखांची मागणी केल्याप्रकरणी, तसेच शिवीगाळ करून जिवे मारण्याची धमकी दिल्याप्रकरणी मनसे वाहतूक सेनेचे जिल्हाध्यक्ष राजू जाधव यांच्याविरोधात जुना राजवाडा पोलिस ठाण्यात सोमवारी रात्री गुन्हा नोंद झाला.

प्रवीण बाळकृष्ण पाटील हे शेअर मार्केट ब्रोकरचा व्यवसाय करतात. ते पत्नी, मुलगा व मुलीसह पाचगाव येथे राहतात. मनसे वाहतूक सेनेचे जिल्हाध्यक्ष राजू जयसिंग जाधव (रा रामगल्ली, मंगळवार पेठ, कोल्हापूर) याच्याशी त्यांची मैत्री आहे. त्यांनी शेअर मार्केटच्या व्यवसायाकरिता राजू जाधव यांच्याकडून पाच लाख रुपये व्याजाने घेतले होते. त्या मोबदल्यात प्रवीण पाटील यांनी खाजगी सावकार राजू जाधव यांच्याकडून घेतलेल्या कर्जापोटी ३ लाख ४ हजार २०० रुपये महिंद्रा फायनान्स कंपनीत पैसे भरले. तसेच जाधव याला १० लाख रुपये व्याज दिले. तसेच १५ ते ३१ जुलै २०१७ या कालावधीत सावकार राजू जाधव याच्या आयडीबीआय बँकेच्या खात्यावर ७ लाख १० हजार रुपये व्याजासहीत भरले होते.

यानंतरही खाजगी सावकर जाधव याने व्याजाच्या पैशाच्या बदल्यात आणखीन ४ लाख रुपयांची मागणी केली. ही रक्कम देण्यास प्रवीण पाटील यांनी नकार दिल्याने सावकाराने त्याच्या स्कार्पीओ गाडीच्या हप्त्याची रक्कम भरण्यास सांगितले. याला पाटील याने नकार दिल्याने खाजगी सावकार जाधव याने स्वतःच्या मोबाइलवरुन पाटील यांना फोन करून आणि घरी जाऊन त्यांना शिवीगाळी केली. ठार मारण्याची धमकी दिली. या त्रासाला कंटाळून प्रवीण पाटील यांनी कुटुंबासह राजवाडा पोलिस ठाण्यात जाऊन फिर्याद दिली.