ट्रकच्या धडकेत
मोपेडस्वार महिला गंभीर
म. टा. प्रतिनिधी, कोल्हापूर
भरधाव ट्रक व मोपेडच्या धडकेत मोपेडवरील महिला गंभीर जखमी झाली. मध्यवर्ती बसस्थानक ते तावडे हॉटेल मार्गावर लिशां हॉटेल चौकात बुधवारी (ता. ९) सांयकाळी हा अपघात झाला. सुरेखा संजयकुमार स्वामी (वय ४६, रा. मोरे-माने नगर, कळंबा) असे जखमी महिलेचे नाव आहे. त्यांच्या डोक्याला मार लागल्याने उपचारासाठी खासगी रुग्णालयात दाखल केले आहे.
सुरेखा स्वामी या मार्केट यार्ड परिसरात खासगी कंपनीत नोकरी करतात. कामावरून घरी जाताना लिशां हॉटेल चौकात ट्रकने त्यांच्या मोपेडला धडक दिली. या अपघातात त्या बाजूला फेकल्या गेल्या, तर मोपेड ट्रकखाली चिरडली. सुरेखा यांच्या डोक्याला मार लागल्याने त्या जखमी झाल्या. परिसरातील नागरिकांनी त्यांना खासगी रुग्णालयात दाखल केले. मोपेडवरून बाजूला फेकल्या गेल्याने मोठा अनर्थ टळला. मोपेडचा ट्रकखाली चिरडून चक्काचूर झाला. रात्री उशिरापर्यंत याप्रकरणी शाहूपुरी पोलिस ठाण्यात गुन्हा दाखल करण्याचे काम सुरू होते.