मराठा व्होटबँक जाण्याची पवारांना भीती!

मटा ऑनलाइन वृत्त । कोल्हापूर

छत्रपती संभाजीराजे यांच्यामुळे मराठा व्होटबँक भाजपकडे जाईल, अशी भीती वाटत असल्यानेच शरद पवार संभाजीराजेंवर टीका करत आहेत, असा निशाणा छत्रपतींचे निकटवर्तीय, अखिल भारतीय शिवराज्याभिषेक समितीचे कार्याध्यक्ष फत्तेसिंग सावंत यांनी लगावला आहे.

केंद्रातील भाजप सरकारच्या शिफारशीवरून संभाजीराजे यांची राष्ट्रपतींनी राज्यसभा सदस्यपदी नियुक्ती केली आहे. या नियुक्तीवर राष्ट्रवादी काँग्रेसचे अध्यक्ष शरद पवार यांनी पाच दिवसांत दोनदा टीका केली आहे. कोल्हापुरात नवीन राजवाड्यावर संभाजीराजेंना भेटल्यानंतर 'फडणवीसांकडून छत्रपतींची नियुक्ती झाली', असा टोला पवार यांनी लगावला होता. त्यावर ‘संभाजीराजेंची नियुक्ती मी केली नाही. ही नियुक्ती पंतप्रधान नरेंद्र मोदी आणि राष्ट्रपतींनी केली. मी शाहू विचारांचा सेवक आहे. मी छत्रपतींचा फक्त सेवक आहे,’ असे प्रत्युत्तर मुख्यमंत्री देवेंद्र फडणवीस यांनी कागल येथे बोलताना दिले होते. या जुगलबंदीवरच हा विषय थांबलेला नसून संभाजीराजे यांच्या समर्थकांनीही आता पवार यांच्यावर निशाणा साधण्यास सुरुवात केली आहे.

पवारांच्या टिपण्णीवर संभाजीराजे यांनी कोणतीही प्रतिक्रिया दिलेली नसली तरी त्यांचे निकटवर्तीय फत्तेसिंग सावंत यांनी पवार यांना थेट प्रत्युत्तर दिलं आहे. 'आपल्याला जे करता आलं नाही ते दुसऱ्याने केलं म्हणून खरं तर पवारांची अडचण झाली आहे', असा टोला लगावत पवार यांच्या मराठा मतांच्या राजकारणाला सावंत यांनी लक्ष्य केलं आहे.