विकासकामासह वसुलीही थांबली : कर जमा करण्याचे प्रशासनाचे आवाहन
कोल्हापूर टाइम्स टीम
रस्ते दुरुस्ती, काळम्मावाडी थेट पाइपलाइन योजना, अंबाबाई तीर्थक्षेत्र विकास आराखडा या विकासकामाना ब्रेक लागला आहे. बांधकाम परवाने ठप्प असताना विविध कर रुपाने जमा होणारा महसूलही थांबला आहे. महापालिकेच्या चाकांना वेग न मिळाल्यास त्यांचे आर्थिक गंभीर परिणाम दिसून येणार आहेत. प्रसंगी पुढील महिन्याचे वेतन अदा करताना प्रशासनाला वेगळा मार्ग धुंडाळावा लागण्याची शक्यता आहे.
वळिवाच्या पावसाने हजेरी लावण्यास सुरुवात झाल्यानंतर महापालिकेची सर्वच विकासकामे अत्यंत वेग घेतात. पावसाळ्यापूर्वी कामे करण्यासाठी एकच धावपळ उडते. विशेषत: रस्ते दुरुस्तीसह अन्य कामे मार्गी लावण्यासाठी युद्धपातळीवर प्रयत्न केले जातात. पण सद्य:स्थितीत करोनाच्या उद्भवलेल्या संकटामुळे महापालिकेची संपूर्ण विकासकामे आणि वसुलीही पूर्णपणे ठप्प झाली आहेत. महापुरामध्ये खराब झालेल्या रस्त्यांची दुरुस्ती करण्यासाठी डिसेंबर २०१९ पासून सुरुवात झाली. केवळ दोन महिन्यात अनेक रस्त्यांची कामे मार्गी लगत असताना दहा मार्चपासून पॅचवर्कसह नवीन रस्त्यांची कामे पूर्णपणे थांबली आहेत. त्यामुळे पावसाळ्यात शहरवासियांना खाचखळग्यातूनच मार्ग काढावा लागण्याची शक्यता आहे.
शहराला थेट पाइपलाइन योजनेद्वारे पाणीपुरवठा करण्यासाठी काळम्मावाडी योजना सुरू केली. यावर्षी कोणत्याही स्थिती काम पू्र्ण करण्याचे निश्चित करण्यात आले होते पण या महत्त्वकांक्षी योजनेला चांगलाच ब्रेक लागला आहे. काम करण्यासाठी अन्य राज्यातून येणारे मजूर लॉकडाउनमुळे अडकल्याने ऐन हंगामात योजनेचे काम बंद पडले आहे. यामुळे वर्षाखेरीस शहरात पाणी पडण्याची शक्यता जवळपास दुरापास्त झाली आहे. अशीच स्थिती अंबाबाई तीर्थक्षेत्र विकास आराखड्याच्या कामाबाबत दिसून येते. फेब्रुवारी महिन्यात बहुमजली पार्किंग इमारतीचे भूमीपूजन करण्यात आले. पण त्यानंतर अवघ्या १५ दिवसांत उद्भवलेल्या परिस्थितीमुळे काम आहे, त्याच स्थितीत राहिले आहे.
लॉकडाउनच्या सर्वाधिक परिणाम महापालिकेच्या वसुलीवर झाला आहे. जानेवारी महिन्यापासून वसुली मोहिमेने प्रचंड वेग घेतला होता. एक महिन्यात महापालिकेच्या तिजोरीत ९० कोटींची भर पडली होती. परिणामी यावर्षीचे उद्दिष्टपुर्ती होणार असल्याचे शक्यता वर्तवली जात होती. पण त्यानंतर वसुली पूर्णपणे थांबली आहे. वसुलीची अशीच स्थिती राहिल्यास एप्रिल महिन्याचे वेतन देताना महापालिकेला प्रचंड मेहनत घ्यावी लागण्याची शक्यता नाकारता येत नाही.
पॉइंटर
आर्थिक स्थिती नाजूक
पुढील महिन्यात वेतनाचा गंभीर प्रश्न
पावसाळ्यात खड्ड्यातून प्रवास
बहुतांशी खर्च आरोग्य व्यवस्थेवर
आरोग्य सेवा वगळता इतर कामे ठप्प
पाणीपुरवठा, ड्रेनेज व नालासफाई या अत्यावश्यक कामे करण्यासाठी कोणतीही अडचण नाही. बांधकाम विभागाला परवाना देण्याचे निर्देश दिले आहेत. सोमवारी (ता.२०) सरकारच्या मार्गदर्शक सूचनानंतर विकासकामांना सुरुवात होईल. तत्पूर्वी मिळकतदारांनी आपले विविध कर ऑनलाइन प्रणालीद्वारे जमा करावेत.
डॉ. मल्लिनाथ कलशेट्टी, आयुक्त
सरकारी निधीतून मंजूर कामांना परवाना मिळाल्यास ती सुरू करता येतील. दलित वस्ती सुधारणा निधितील कामेही सुरू होतील. मात्र स्वनिधीतील कामे सुरू करण्यासाठी अडचणी येऊ शकतात.
नेत्रदीप सरनोबत, शहर अभियंता